पुणे : वंचित बहुजन आघाडी, पुणे शहराच्या वतीने महावितरणकडून राज्यभरात सुरू असलेल्या स्मार्ट मीटर बसवण्याच्या सक्तीविरोधात आणि वीज ग्राहकांच्या हितसंरक्षणासाठी रास्ता पेठ येथील महावितरण कार्यालयासमोर जनआक्रोश आंदोलन करण्यात आले.
आंदोलनादरम्यान वीज ग्राहकांच्या संमतीशिवाय स्मार्ट मीटर बसविण्याच्या प्रकाराचा तीव्र निषेध करण्यात आला. वीज ग्राहकांची पूर्वपरवानगी घेणे आवश्यक असताना महावितरणचे कर्मचारी अनेक ठिकाणी कोणतीही पूर्वसूचना न देता जुने मीटर काढून स्मार्ट मीटर बसवत असल्याचा आरोप आंदोलनकर्त्यांनी केला.
स्मार्ट मीटर बसविल्यानंतर वीज बिल वेळेत न भरल्यास वीजपुरवठा तात्काळ खंडित होण्याची शक्यता असल्याची चिंता व्यक्त करण्यात आली. तसेच स्मार्ट मीटरमुळे वीज बिलामध्ये वाढ होण्याची भीती नागरिकांमध्ये निर्माण झाली असून, आधीच महागाईचा सामना करणाऱ्या सर्वसामान्य, गरीब आणि वंचित नागरिकांवर अतिरिक्त आर्थिक बोजा टाकण्याचा हा प्रयत्न असल्याचे आंदोलनकर्त्यांनी सांगितले.
यावेळी महाराष्ट्र शासनासह स्वतःला विरोधी पक्ष म्हणवून घेणारे राजकीय पक्षही जनतेच्या मूलभूत प्रश्नांवर मौन बाळगत असल्याची टीका करण्यात आली. सर्वसामान्य वीज ग्राहकांच्या हिताचा विचार न करता काही मोजक्या उद्योगपतींच्या फायद्यासाठी स्मार्ट मीटर योजना राबविली जात असल्याचा आरोप वंचित बहुजन आघाडीच्या वतीने करण्यात आला.
महावितरणने स्मार्ट मीटर बसविण्याची सक्ती तात्काळ थांबवावी, अन्यथा आगामी काळात आंदोलन अधिक तीव्र करण्यात येईल. तसेच स्मार्ट मीटरची होळी करून व्यापक जनआंदोलन उभारण्यात येईल, असा इशाराही वंचित बहुजन आघाडी, पुणे शहराच्या वतीने देण्यात आला.
या आंदोलनात वंचित बहुजन आknघाडीच्या पुणे शहरातील विविध विभागांचे पदाधिकारी, कार्यकर्ते तसेच पर्वती विधानसभा मतदारसंघातील पदाधिकारी मोठ्या संख्येने सहभागी झाले होते.
