पनवेल : वंचित बहुजन आघाडी, पनवेल महानगरच्या शिष्टमंडळाने आज पनवेल महानगरपालिकेच्या विरोधी पक्षनेत्यांची भेट घेऊन अनुसूचित जातींसाठीच्या बजेटसंदर्भात सखोल चर्चा केली. महानगरपालिका सभागृहात या विषयावर प्रश्न उपस्थित करणे तसेच बजेटबाबतची संपूर्ण माहिती लेखी स्वरूपात उपलब्ध करून देण्याची मागणी यावेळी करण्यात आली.
तसेच सन २०२५-२६ या आर्थिक वर्षात पनवेल महानगरपालिकेला एकूण किती निधी प्राप्त झाला आहे, त्यापैकी मागासवर्गीय समाजाच्या कल्याणकारी योजनांसाठी किती निधीची तरतूद करण्यात आली आहे. तसेच हा निधी प्रत्यक्षात वापरण्यात आला आहे का, वापरला असल्यास तो कोणत्या विभागात आणि कोणत्या योजनांसाठी खर्च करण्यात आला, याबाबतही चर्चा करण्यात आली.
महानगरपालिकेकडे मागासवर्गीय समाजाच्या विकासासाठी निधी उपलब्ध असल्यास, तो निधी पनवेल महानगरातील विविध विभागांमधील मागासवर्गीय समाजाच्या शैक्षणिक, सामाजिक व आर्थिक विकासासाठी प्रभावीपणे वापरण्यात यावा, अशी मागणी वंचित बहुजन आघाडीच्या शिष्टमंडळाने केली.
तसेच पनवेल महानगरातील वंचित बहुजन आघाडीचे विभागीय अध्यक्ष, पदाधिकारी, कार्यकारिणी सदस्य व कार्यकर्त्यांकडून त्यांच्या-त्यांच्या विभागातील मागासवर्गीय समाजासाठी आवश्यक असलेल्या विविध कल्याणकारी योजनांची माहिती मागविण्यात आली आहे. या योजनांचा प्रस्ताव तयार करून महानगरपालिका सभागृहात मांडण्यात येईल आणि त्या पूर्ण करण्यासाठी पाठपुरावा करण्याचे आश्वासन यावेळी देण्यात आले.
याप्रसंगी वंचित बहुजन आघाडी पनवेल महानगर अध्यक्ष आनंद गायकवाड, महासचिव संतोष मजमुले, उपाध्यक्ष कविताताई वाघमारे, उपाध्यक्ष छायाताई शिरसाट, उपाध्यक्ष सतीश अहिरे, संघटक नारायण माळी, कोषाध्यक्ष चंद्रकांत नवगीरे सर, खांदा कॉलनी अध्यक्ष महेंद्र रोकडे, कळंबोली अध्यक्षा ॲड. सुनिता इंगळे, अत्तम मुजमुले यांच्यासह वंचित बहुजन आघाडीचे पदाधिकारी व कार्यकर्ते उपस्थित होते.
