मुस्लिम समाजासाठी जागा आरक्षित व मंजूर तरी ताब्यात नाही
उल्हासनगर : मुस्लिम समाजासाठी आरक्षित व मंजूर करण्यात आलेली दफनभूमीची जागा अद्याप त्यांच्या ताब्यात देण्यात आलेली नसल्याच्या मुद्द्यावर वंचित बहुजन आघाडीने उल्हासनगर प्रशासनाविरोधात तीव्र नाराजी व्यक्त केली आहे. प्रशासनाच्या दुटप्पी भूमिकेचा निषेध करत पक्षाने तातडीने निर्णय घेण्याची मागणी केली असून अन्यथा आंदोलन छेडण्याचा इशाराही दिला आहे.
वंचित बहुजन आघाडीच्या पदाधिकाऱ्यांनी प्रसिद्धीस दिलेल्या निवेदनात म्हटले आहे की, उल्हासनगरमध्ये हिंदू समाजासाठी स्मशानभूमी, ख्रिश्चन समाजासाठी दफनभूमी तसेच प्राण्यांच्या दफनासाठीही व्यवस्था उपलब्ध आहे. मात्र मुस्लिम समाजासाठी जागा आरक्षित व मंजूर असतानाही ती प्रत्यक्षात समाजाच्या ताब्यात देण्यात आलेली नाही. त्यामुळे मुस्लिम समाजाला त्यांच्या मूलभूत धार्मिक हक्कांपासून वंचित ठेवले जात असल्याचे सांगण्यात आले आहे.
Also Read : मुंबईतील नागरी समस्यांबाबत वंचित बहुजन आघाडीचे शिष्टमंडळ आयुक्त अश्विनी भिडे यांची भेट
या प्रश्नाकडे प्रशासनाने गांभीर्याने लक्ष देऊन मंजूर दफनभूमीची अंमलबजावणी तातडीने करावी आणि संबंधित जागा मुस्लिम समाजाच्या ताब्यात द्यावी, अशी मागणी वंचित बहुजन आघाडीने केली आहे. याबाबत लवकरात लवकर ठोस निर्णय न घेतल्यास वंचित बहुजन आघाडी मुस्लिम समाजाच्या हक्कासाठी त्यांच्या खांद्याला खांदा लावून रस्त्यावर उतरेल, असा इशाराही पक्षाकडून देण्यात आला आहे. तसेच भविष्यात होणाऱ्या कोणत्याही आंदोलनाची संपूर्ण जबाबदारी प्रशासनाची असेल, असेही निवेदनात नमूद करण्यात आले आहे.
