चाळीसगाव (जळगाव) : भीम जयंती कार्यक्रमादरम्यान झालेल्या गोंधळप्रकरणी चाळीसगावचे आमदार मंगेश रमेश चव्हाण यांच्याविरोधात गुन्हा दाखल करण्याची मागणी करण्यात आली आहे. याबाबत वंचित बहुजन आघाडीचे चाळीसगाव तालुका अध्यक्ष संदीप कांबळे यांनी मेहुणबारे पोलिस ठाण्यात लेखी तक्रार दाखल केली आहे.
१४ एप्रिल २०२६ रोजी चाळीसगाव तालुक्यातील टाकळी येथे डॉ. बाबासाहेब आंबेडकर जयंतीनिमित्त कार्यक्रमाचे आयोजन करण्यात आले होते. या कार्यक्रमादरम्यान काही व्यक्तींनी गोंधळ घातला. मिरवणुकी दरम्यान गावातील लाईट बंद करून दगडफेक करण्यात आली. यामुळे कार्यक्रमस्थळी तणावपूर्ण वातावरण निर्माण झाले होते.
पोलीस स्टेशन मध्ये तक्रार दाखल करायला गेलेल्या संदीप कांबळे यांना भाजप आमदार मंगेश चव्हाणने संतप्त भाषेत धमकीवजा वक्तव्य केल्याचा आरोप करण्यात आला आहे. या वक्तव्यामुळे तक्रारदाराच्या जीवितास धोका निर्माण झाल्याची भावना व्यक्त करण्यात आली असून, सार्वजनिक शांततेचा भंग झाल्याचेही नमूद करण्यात आले आहे.
तसेच, या घटनेदरम्यान कार्यक्रमात वाद निर्माण होऊन काही काळ तणावाची परिस्थिती निर्माण झाली होती. उपस्थित नागरिकांमध्ये भीतीचे वातावरण निर्माण झाले असल्याचेही तक्रारीत नमूद करण्यात आले आहे.
या प्रकरणात भारतीय दंड संहितेच्या कलम ५०३ (गुन्हेगारी धमकी), ५०६ (धमकी दिल्याबद्दल शिक्षा) आणि ५०४ (जाणीवपूर्वक अपमान करून भांडणास प्रवृत्त करणे) अंतर्गत गुन्हा नोंदविण्याची मागणी करण्यात आली आहे. तसेच अनुसूचित जाती-जमाती अत्याचार प्रतिबंधक कायदा, १९८९ अंतर्गतही कारवाई करण्याची मागणी करण्यात आली आहे.
या घटनेमुळे परिसरात तणावाचे वातावरण निर्माण झाले असून, पोलिसांनी या प्रकरणाची गंभीर दखल घेऊन योग्य ती कारवाई करावी, अशी मागणी होत आहे. वंचित बहुजन आघाडी जळगाव पश्चिम जिल्हा अध्यक्ष शमीभा पाटील यांनी चाळीसगावमध्ये जाऊन मोर्चा काढला.
