कोलकाता: पश्चिम बंगालची राजधानी कोलकाता येथील मध्यवर्ती भागातील अतिशय प्रसिद्ध आणि गर्दीच्या चोरबागान सार्वजनिक दुर्गा पूजा मंडपात सप्तमीच्या संध्याकाळी एका दुर्दैवी दुर्घटनेत मोठी चेंगराचेंगरी झाली. या भीषण दुर्घटनेत १९ जणांचा मृत्यू झाल्याची भीती व्यक्त केली जात आहे. याशिवाय, २५ ते ३० भाविक गंभीर जखमी झाले असून त्यांना तत्काळ कोलकाता मेडिकल कॉलेज आणि रुग्णालयात दाखल करण्यात आले आहे. जखमींपैकी अनेकांची प्रकृती चिंताजनक असल्यामुळे मृतांचा आकडा वाढण्याची शक्यता असल्याचे सांगण्यात आले आहे.
मिळालेल्या माहितीनुसार, सप्तमीच्या दिवशी संध्याकाळी मंडपात हजारो भाविकांची अलोट गर्दी जमली होती. यादरम्यान अचानक मुसळधार पाऊस सुरू झाल्याने बाहेर उभे असलेले भाविक तात्काळ आसऱ्यासाठी मंडपाच्या दिशेने धावले. दुसरीकडे, आतील लोकांना बाहेर पडण्यास मार्ग मिळेनासा झाला आणि बाहेरील तुफान गर्दीने एकाच वेळी रेटारेटी केल्यामुळे तिथे प्रचंड गोंधळ उडाला. आणि तात्पुरत्या उभारलेल्या पायऱ्यांवरून लोक एकमेकांवर कोसळले. यातच मंडपाच्या लोखंडी संरचनेचा (Iron Structure) काही भाग कोसळल्यामुळे जीवितहानी अधिक झाली. अवघ्या ५ ते ७ मिनिटात हा थरार घडला.
पोलिसांची कारवाई आणि आयोजक फरार
कोलकाता पोलिसांनी दिलेल्या माहितीनुसार, १७ ऑक्टोबर रोजी सायंकाळी ७:४० वाजता मुसळधार पावसामुळे अचानक सर्व जण एकाच वेळी एक्झिट गेटच्या दिशेने धावले. क्षणार्धात गर्दी नियंत्रणाबाहेर गेल्याने ही चेंगराचेंगरी झाली.
तसेच दुर्घटना घडल्यानंतर पोलिसांनी तात्काळ पावले उचलत संबंधित दुर्गा पूजा मंडप बंद केला आहे. मात्र, या दुर्दैवी घटनेनंतर पूजा कमिटीचे आयोजक घटनास्थळावरून फरार झाल्याचे समजते. सध्या सुरक्षेचा उपाय म्हणून भाविकांसाठी मंडपाचे सर्व गेट पूर्णपणे बंद करण्यात आले असून पोलीस प्रशासनाकडून पुढील तपास सुरू आहे.
