नवी दिल्ली : येत्या १ एप्रिलपासून आयकर, PAN आणि ITR संदर्भातील नियमांमध्ये काही महत्त्वाचे बदल लागू होणार असून याचा थेट परिणाम करदाते आणि सर्वसामान्य नागरिकांवर होणार आहे. सरकारने व्यवहार अधिक पारदर्शक आणि सुरक्षित करण्यासाठी हे बदल लागू केले आहेत.
PAN कार्डसंदर्भातील नियम अधिक कडक करण्यात आले आहेत. वाहन खरेदी-विक्रीसारख्या मोठ्या आर्थिक व्यवहारांसाठी आता PAN देणे बंधनकारक असणार आहे. यामुळे आर्थिक व्यवहारांमध्ये पारदर्शकता वाढण्यास मदत होणार आहे. (Income Tax Update)
करदात्यांसाठी मोठा दिलासा देणारा बदल म्हणजे टॅक्स रिजीम निवडण्याची प्रक्रिया आता अधिक सुलभ करण्यात आली आहे. करदाते आता थेट ITR फॉर्म भरताना नवीन किंवा जुनी टॅक्स प्रणाली निवडू शकतील.
कर्मचाऱ्यांसाठी मील बेनिफिट्समध्ये मोठी वाढ करण्यात आली आहे. यापूर्वी मील कार्ड किंवा व्हाऊचरवर (जसे Sodexo, Pluxee) ५० रुपयांपर्यंत करसवलत मिळत होती. आता ही मर्यादा वाढवून प्रति मील २०० रुपये करण्यात आली आहे. यामुळे नोकरदार वर्गाला मोठा फायदा होणार आहे. (Income Tax Update)
हाऊस रेंट अलाउन्स (HRA) अंतर्गत ५० टक्के सूट मिळणाऱ्या शहरांमध्ये आता वाढ करण्यात आली आहे. यामध्ये आधीच्या दिल्ली, मुंबई, चेन्नई आणि कोलकाता या शहरांसोबतच बंगळुरू, हैदराबाद, पुणे आणि अहमदाबाद यांचा समावेश करण्यात आला आहे. (Income Tax Update)
डिजिटल व्यवहार अधिक सुरक्षित करण्यासाठी नवीन नियम लागू करण्यात आले आहेत. यानुसार कोणतेही डिजिटल पेमेंट केवळ एका OTP वर पूर्ण होणार नाही. प्रत्येक व्यवहारासाठी किमान दोन प्रमाणीकरण पद्धती (2FA) आवश्यक असतील, जसे OTP, PIN, पासवर्ड किंवा बायोमेट्रिक पडताळणी.
