मध्य प्रदेश: मध्यप्रदेशात एका धक्कादायक प्रकरणामुळे प्रशासकीय वर्तुळात मोठी खळबळ उडाली आहे. कौन बनेगा करोडपती या लोकप्रिय कार्यक्रमात सहभागी झालेल्या महिला तहसीलदार अमृता सिंह तोमर यांना आर्थिक गैरव्यवहाराच्या आरोपावरून अटक करण्यात आली आहे.
2021 साली बडोदा तहसील परिसरात झालेल्या सुमारे अडीच कोटी रुपयांच्या गैरव्यवहार प्रकरणात ही कारवाई करण्यात आली. ग्वालियरमधून त्यांना ताब्यात घेण्यात आले असून न्यायालयात हजर केल्यानंतर त्यांना न्यायालयीन कोठडी सुनावण्यात आली आहे. सध्या त्यांना शिवपुरी येथील कारागृहात ठेवण्यात आले आहे. (KBC Winner and Tehsildar Amrita Singh Tomar Arrested)
तोमर या यापूर्वी कौन बनेगा करोडपती या कार्यक्रमात स्पर्धक म्हणून सहभागी झाल्या होत्या आणि त्यांनी 50 लाख रुपये जिंकले होते. त्यामुळे त्यांच्या अटकेची बातमी समोर येताच चाहत्यांमध्ये आश्चर्य व्यक्त केले जात असून सोशल मीडियावर विविध प्रतिक्रिया उमटत आहेत.
तपासानुसार, श्योपुर जिल्ह्यातील पुरग्रस्तांसाठी वितरित करण्यात येणाऱ्या मदतनिधीत गैरव्यवहार झाल्याचा आरोप आहे. त्या वेळी तोमर तहसीलदार पदावर कार्यरत होत्या. कंत्राटदारांच्या मदतीने 127 बनावट बँक खाती उघडून सरकारी निधी वळवण्यात आल्याचे समोर आले आहे. हा प्रकार उपजिल्हाधिकाऱ्यांनी केलेल्या ऑडिटमध्ये उघडकीस आला. (KBC Winner and Tehsildar Amrita Singh Tomar Arrested)
या प्रकरणी बडोदा पोलिस ठाण्यात गुन्हा दाखल करण्यात आला होता. अटकेपूर्वी त्यांनी ग्वालियर खंडपीठात जामीनासाठी अर्ज केला होता, मात्र तो फेटाळण्यात आला. त्यानंतर त्यांनी सर्वोच्च न्यायालयात धाव घेतली, परंतु तेथूनही दिलासा मिळाला नाही. अखेर पोलिसांनी त्यांना अटक केली असून त्यांना विजयपूर तहसीलदार पदावरूनही हटवण्यात आले आहे.
