पुणे: डॉ. बाबासाहेब आंबेडकर संशोधन व प्रशिक्षण संस्था (बार्टी) मार्फत देण्यात येणारी सन २०२३, २०२४ आणि २०२५ ची पीएचडी फेलोशिप (BANRF) जाहिरात अद्याप प्रसिद्ध न झाल्याने अनुसूचित जातीच्या विद्यार्थ्यांमध्ये तीव्र संताप व्यक्त होत आहे. यासंदर्भात सम्यक विद्यार्थी आंदोलनाच्या वतीने बार्टीच्या महासंचालकांना निवेदन देण्यात आले असून, जाहिरात तत्काळ प्रसिद्ध न झाल्यास कायदेशीर मार्गाने लढा देण्याचा इशारा देण्यात आला आहे. (BARTI PhD Fellowship)
मिळालेल्या माहितीनुसार, महाज्योती आणि सारथी यांसारख्या इतर शासकीय संस्थांकडून इतर मागासवर्गीय (OBC) आणि मराठा समाजातील पात्र विद्यार्थ्यांना २०२३ ची पीएचडी फेलोशिप आधीच प्रदान करण्यात आली आहे. मात्र, ‘समान निकष धोरण’ लागू करण्याच्या नावाखाली बार्टीची २०२३ ची जाहिरात अद्याप रोखून धरण्यात आली आहे. इतर संस्थांप्रमाणे जाहिरात न काढता केवळ बार्टीच्या विद्यार्थ्यांवरच हे धोरण लादणे, हा अनुसूचित जातीच्या विद्यार्थ्यांवर मोठा अन्याय असल्याचे निवेदनात म्हटले आहे. (BARTI PhD Fellowship)
Also Read : शिक्षकाच्या आत्महत्येने बीड हादरले; ॲट्रॉसिटी ॲक्ट अंतर्गत गुन्हा दाखल करण्याची वंचितची मागणी
या धोरणात्मक दिरंगाईमुळे अनेक पात्र विद्यार्थी उच्च शिक्षणाच्या प्रवाहातून बाहेर पडण्याच्या मार्गावर आहेत, कारण त्यांच्या पीएचडी शिक्षणाचे तीन वर्षांचे कालावधी पूर्ण होत आले आहेत. तरीही शासनाकडून अद्याप जाहिरात प्रसिद्ध करण्यात आलेली नाही. या अन्यायाची दखल घेऊन सन २०२३, २०२४ आणि २०२५ ची जाहिरात तातडीने प्रसिद्ध करावी, अशी मागणी करण्यात आली आहे. अन्यथा, विद्यार्थ्यांचे शैक्षणिक नुकसान टाळण्यासाठी नाईलाजास्तव न्यायालयात किंवा अनुसूचित जाती/जमाती आयोगाकडे धाव घ्यावी लागेल, अशी स्पष्ट भूमिका प्रशांत बोराडे (प्रदेश प्रवक्ता, महाराष्ट्र), ऋषिकेश कांबळे, आकाश शेलार, नालंदा वाकोडे, आणि प्रवीण हिवराळे यांनी व्यक्त केली आहे. (BARTI PhD Fellowship)
