Vanchit Bahujan Aghadi Protest : देशभरातील लाखो विद्यार्थ्यांचे भविष्य अंधारात टाकणाऱ्या NEET-UG २०२६ परीक्षेच्या प्रश्नपत्रिका फुटी प्रकरणाविरोधात वंचित बहुजन आघाडी प्रणीत सम्यक विद्यार्थी आंदोलनाच्या अहमदनगरमध्ये वतीने जिल्हाधिकारी कार्यालयासमोर शांततामय मार्गाने धरणे आंदोलन करण्यात आले. आंदोलन संपल्यानंतर कार्यकर्त्यांनी उपचिटनीस तथा नायब तहसीलदार मयुर बेरड (गृह शाखा) यांना आपल्या मागण्यांचे अधिकृत निवेदन सुपूर्द केले.
हे आंदोलन वंचित बहुजन आघाडीचे जिल्हाध्यक्ष योगेश साठे यांच्या नेतृत्वाखाली पार पडले. या प्रसंगी सम्यक विद्यार्थी आंदोलनाचे जिल्हाध्यक्ष अजित कुऱ्हाडे, उप महासचिव पंकज गायकवाड, तसेच अविनाश ठोंबरे, प्रसाद कांबळे, आणि संकेत शिंदे आदी पदाधिकारी व कार्यकर्ते उपस्थित होते. निवेदनात पुढील मागणी करण्यात आली आहे :
– NEET-UG २०२६ पेपरफुटीची नैतिक जबाबदारी स्वीकारून केंद्रीय शिक्षणमंत्री धर्मेंद्र प्रधान यांनी तातडीने राजीनामा द्यावा.
– परीक्षा घेण्याची जबाबदारी National Testing Agency (NTA) कडून काढून घेऊन ती UPSC कडे सोपवण्यात यावी.
– विद्यार्थ्यांसाठी NEET ची फेरपरीक्षा पूर्णपणे विनामूल्य आणि तत्काळ घेण्यात यावी.
– व्यावसायिक कोचिंग क्लासेसवर नियंत्रण ठेवण्यासाठी केंद्र व राज्य सरकारने स्वतंत्र व कडक कायदा लागू करावा.
शिक्षणाचा हा वाढता बाजार आणि भ्रष्टाचार थांबवला नाही, तर आंदोलन अधिक तीव्र करण्याचा इशारा या वेळी सम्यक विद्यार्थी आंदोलनाच्या वतीने देण्यात आला.
