मुंबई : अमेरिकेचे राष्ट्राध्यक्ष डोनाल्ड ट्रम्प हे भारताची प्रतिमा जागतिक स्तरावर मलीन करत असून, पंतप्रधान नरेंद्र मोदी त्यांच्या हातातील बाहुलीसारखे वागत आहेत, असे वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर म्हणाले. मोदींच्या या धोरणांमुळे देशाचे मोठे नुकसान होत आहे. त्यामुळे त्यांनी विरोधकांना एकत्र येण्याचे आवाहन केले आहे. प्रकाश आंबेडकर यांनी आपल्या अधिकृत सोशल मीडिया अकाऊंटवरून यासंदर्भात आपली भूमिका स्पष्ट केली.
ते म्हणाले, डोनाल्ड ट्रम्प जे सांगतात, तेच मोदी करतात. रशियाकडून तेल खरेदी न करण्याच्या अमेरिकेच्या दबावापुढे भारत झुकला असून, रशियाकडून तेल खरेदी थांबवण्यात आली आहे, असे ॲड. प्रकाश आंबेडकर म्हणाले. (Prakash ambedkar)
भारतीय कृषी क्षेत्र अमेरिकेसाठी खुले करण्याचे पाऊल उचलले जात असून, यामुळे भारतीय शेतकऱ्यांचे हित धोक्यात येईल, अशी भीती त्यांनी व्यक्त केली. तसेच टेक्सटाईलवरील (कापड उद्योग) आयात शुल्क २.५ टक्क्यांवरून थेट १८ टक्क्यांपर्यंत वाढवण्यात आले आहे. ही वाढ उद्योगासाठी मारक असतानाही पंतप्रधान मोदी याला चांगली गोष्ट म्हणत आहेत. हे अनाकलनीय आहे. (Prakash ambedkar)
पंतप्रधान नरेंद्र मोदी यांची एखादी ‘नस’ जणू डोनाल्ड ट्रम्प यांच्या हातात लागली आहे आणि त्याद्वारे ते मोदींना नाचवत आहेत, अशी भावना निर्माण होत आहे. ही परिस्थिती देशासाठी अपमानास्पद असून जनहिताच्या दृष्टीने अत्यंत गंभीर आहे. त्यामुळेच प्रकाश आंबेडकर यांनी काँग्रेस अध्यक्ष मल्लिकार्जुन खर्गे आणि विरोधी पक्षनेते राहुल गांधी यांना पत्र लिहून विनंती केली आहे. विरोधी पक्षांची तातडीने बैठक बोलावून या मुद्द्यावर देशभर जनआंदोलन उभे करावे, जेणेकरून देशाला या दबावातून मुक्त करता येईल, अशी मागणी त्यांनी पत्राद्वारे केली आहे.
