जळगाव : रेल्वे उत्तर वार्डातील अतिक्रमणधारकांच्या पुनर्वसनाच्या मागणीसंदर्भात जळगाव जिल्हाधिकारी कार्यालयात प्रशासकीय बैठक पार पडली. वंचित बहुजन आघाडीच्या मागणीवरून आयोजित करण्यात आलेल्या या बैठकीच्या अध्यक्षस्थानी वस्त्रोद्योग मंत्री संजयजी सावकारे होते. जिल्हाधिकारी रोहन घुगे यांच्या प्रमुख उपस्थितीत ही बैठक घेण्यात आली.
बैठकीत रेल्वे उत्तर वार्डातील अतिक्रमणधारकांच्या पुनर्वसनाच्या प्रक्रियेचा आढावा घेण्यात आला. पुनर्वसनाची सुमारे ८० टक्के प्रक्रिया पूर्ण झाली असून, उर्वरित प्रक्रिया जलद गतीने पूर्ण करण्याच्या सूचना जिल्हाधिकारी रोहन घुगे यांनी संबंधित सर्व अधिकाऱ्यांना दिल्या. अतिक्रमणधारकांचे पुनर्वसन वेळेत पूर्ण व्हावे आणि त्यांना आवश्यक त्या सुविधा उपलब्ध करून देण्यासाठी प्रशासनाने समन्वयाने कार्यवाही करावी, असेही बैठकीत निर्देश देण्यात आले.
यावेळी वंचित बहुजन आघाडीचे युवा जिल्हाध्यक्ष बाळा पवार, संगीत खरे, रुपेश साळुंके यांच्यासह रेल्वे उत्तर वार्डातील अतिक्रमणधारक उपस्थित होते. तसेच भुसावळचे प्रांताधिकारी जितेंद्र पाटील, तहसीलदार नीता लबडे, मुख्याधिकारी विवेक धांडे यांच्यासह नगरपालिका प्रशासनातील संबंधित अधिकारी उपस्थित होते.
