मुंबई : साहिल वाकोडे यांच्या मृत्यू प्रकरणी न्याय मिळावा, तसेच या प्रकरणात संस्थात्मक जबाबदारी निश्चित करावी, या मागणीसाठी वंचित बहुजन आघाडी प्रणित सम्यक विद्यार्थी आंदोलनाच्या वतीने IIT मुंबईच्या प्रवेशद्वारावर आंदोलन करण्यात आले. या आंदोलनाला वंचित बहुजन आघाडीचे युवा नेते व राज्य कार्यकारिणी सदस्य सुजात आंबेडकर यांनी भेट देत आंदोलनकर्त्या विद्यार्थ्यांना पाठिंबा दिला.
यावेळी सुजात आंबेडकर यांनी साहिल वाकोडे यांच्या मृत्यूनंतर IIT मुंबई प्रशासनाकडून त्यांच्याबाबत कथितरीत्या चुकीची आणि खोटी माहिती प्रसारित करण्यात आल्याचा आरोप केला. तसेच, कोणतेही पुरावे नसताना साहिल यांच्यावर करण्यात आलेल्या आरोपांमुळे त्यांचे चारित्र्यहनन आणि मीडिया ट्रायल झाल्याचे त्यांनी म्हटले.
साहिल वाकोडे यांच्या न्यायासाठी त्यांच्या मित्रांनी आणि विद्यार्थ्यांनी सुरू केलेल्या आंदोलनाची सुजात आंबेडकर यांनी भेट घेऊन आंदोलक विद्यार्थ्यांशी संवाद साधला. या लढ्यात आपण त्यांच्या पाठीशी असल्याचे त्यांनी सांगितले.
दरम्यान, सम्यक विद्यार्थी आंदोलनाच्या शिष्टमंडळाने IIT मुंबई प्रशासनाशी चर्चा केली. यावेळी साहिल वाकोडे यांच्याबाबत संस्थेकडून चुकीची माहिती देण्यात आली असल्यास त्याबद्दल प्रशासनाने जाहीर माफी मागावी, अशी मागणी करण्यात आली. तसेच आंदोलन करणाऱ्या विद्यार्थ्यांना कोणत्याही प्रकारचा त्रास देऊ नये, अशी स्पष्ट भूमिका शिष्टमंडळाने प्रशासनासमोर मांडली.
साहिल वाकोडे यांच्यावर करण्यात आलेल्या ‘चिटिंग’च्या आरोपांबाबतही प्रशासनाने स्पष्टीकरण द्यावे, अशी मागणी सुजात आंबेडकर यांनी केली. साहिल वाकोडे यांच्या मृत्यू प्रकरणात न्याय मिळेपर्यंत आंदोलन सुरूच ठेवण्याची भूमिका सम्यक विद्यार्थी आंदोलनाच्या वतीने व्यक्त करण्यात आली.
या आंदोलनावेळी IIT मुंबई परिसरात विद्यार्थी, कार्यकर्ते आणि पदाधिकारी मोठ्या संख्येने उपस्थित होते तसेच यावेळी मोठी गर्दी पहायला मिळाली.
