पुणे – वंचित बहुजन आघाडीच्या सत्ता परिवर्तन महासभेला लाखोंच्या संख्येने जनसमुदाय उपस्थित आहे. या ठिकाणी उत्स्फूर्तपणे नागरिक वंचितला मदत करीत असून, प्रत्येक खुर्चीमागे क्यूआर कोड असलेले स्टिकर्स चिटकविण्यात आल्याने बसल्याजागी मदत करण्याची व्यवस्था सभेमध्ये करण्यात आली आहे.
महामानव डॉ. बाबासाहेब आंबेडकर आणि ॲड. बाळासाहेब आंबेडकर यांचे फोटो या स्टिकरवर असून, याच ठिकाणी क्यूआर कोड देण्यात आलेला आहे. दलित, वंचित, शोषीत समाजाच्या उन्नतीसाठी अहोरात्र संघर्ष करणारे भारतीय घटनेचे शिल्पकार भारतरत्न डॉ. बाबासाहेब आंबेडकर यांचा १४ एप्रिल हा जन्मदिन आहे. या संकल्पनेवर आधारित १४ तारीख आणि चौथा महिना म्हणजे १४.४ या प्रमाणे १४४, १४४०, १४४००, १४४००० या पद्धतीने नागरिक आपली मदत करीत आहेत.
पुण्यासह महाराष्ट्राच्या विविध भागातून आलेले नागरिक आपले फोन बाहेर काढून क्यूआर कोड स्कॅन करून मदत करीत असून, ॲड. बाळासाहेब आंबेडकर यांनी केलेल्या आवाहनाला मोठा प्रतिसाद मिळत असल्याचे दिसून आले.
