कर्नाटकातील चिन्नापूर गाव येथे दलित समाजातील निवृत्त सैनिकाच्या अंत्यसंस्कारावेळी कथित जातीय भेदभाव झाल्याची धक्कादायक घटना समोर आली आहे. या घटनेमुळे परिसरात संतापाचे वातावरण निर्माण झाले असून प्रशासनाने याची गंभीर दखल घेतली आहे.
मिळालेल्या माहितीनुसार, सुमारे २० वर्षे देशाची सेवा केलेले ५५ वर्षीय निवृत्त सैनिक हनमंतप्पा हरिजन यांचे आजारपणामुळे निधन झाले. त्यांच्या अंत्यसंस्कारासाठी दलित समाजातील नातेवाईक आणि परिचित विविध गावांमधून चिन्नापूर येथे आले होते. याच दरम्यान गावात जातीय भेदभाव झाल्याची घटना समोर आली आहे.
कुटुंबीयांच्या म्हणण्यानुसार, अंत्यसंस्कारासाठी गावात पोहोचल्यावर बहुतेक दुकाने आणि हॉटेल्स बंद आढळली. केवळ एकच दुकान उघडे होते. गावातील काही लोकांनी जाणीवपूर्वक दुकाने बंद ठेवण्यात आली. त्यामुळे अंत्यसंस्कारासाठी आलेल्या पाहुण्यांना पाणी, अन्न यांसारख्या मूलभूत गरजांसाठीही अडचणींना सामोरे जावे लागले.
याशिवाय, कुटुंबीयांनी उघड्या असलेल्या दुकानातून ज्यूस खरेदी केला असता दुकानदाराने रोख रक्कम स्वीकारण्यास नकार दिल्याचेही सांगितले. त्याने मोबाईल ऍपद्वारे डिजिटल पेमेंट करण्याचा आग्रह धरल्याचे सांगितले जात आहे. इतकेच नव्हे तर गावात एका दलित व्यक्तीचा मृत्यू झाल्यामुळे दुकाने बंद ठेवली असून दलितांकडून रोख व्यवहार स्वीकारणार नाही, असे वक्तव्य दुकानदाराने केल्याचा आरोपही करण्यात आला आहे.
मृतकाच्या नातेवाईकांनी हा प्रकार सामाजिक भेदभाव आणि अस्पृश्यतेचे उदाहरण असल्याचे सांगितले. देशासाठी दीर्घकाळ सेवा केलेल्या माजी सैनिकाच्या अंत्यसंस्कारावेळी अशी वागणूक मिळणे अत्यंत दुर्दैवी असल्याची भावना त्यांनी व्यक्त केली.
या प्रकरणाची माहिती कुटुंबीयांनी आपत्कालीन क्रमांक ११२ वरून पोलिसांना दिली. त्यानंतर तहसीलदार अमरेश पम्मार, पोलीस अधिकारी, सामाजिक कल्याण विभागाचे प्रतिनिधी तसेच अन्य प्रशासनिक अधिकारी घटनास्थळी दाखल झाले. अधिकाऱ्यांनी गावातील विविध समुदायांच्या प्रतिनिधींना बोलावून बैठक घेतली आणि प्राथमिक चौकशी सुरू केली.
ही घटना देशासाठी सेवा बजावलेल्या माजी सैनिकाच्या अंत्यसंस्काराशी संबंधित असल्यामुळे अधिक संवेदनशील ठरली आहे. गावात तणाव निर्माण होऊ नये यासाठी २ मार्च रोजी शांतता बैठक आयोजित करण्यात येणार असल्याचे प्रशासनाने सांगितले आहे. सध्या पोलीस आणि महसूल विभाग परिस्थितीवर लक्ष ठेवून असून या प्रकरणाचा पुढील तपास सुरू आहे.
