औरंगाबाद : वंचित बहुजन आघाडीचे नगरसेवक जनाब जावेद कुरेशी यांच्या प्रयत्नातून शहरातील ऐतिहासिक डॉ. सलीम अली सरोवराच्या सुशोभीकरण प्रकल्पाला चालना मिळाली आहे. या प्रकल्पाच्या अनुषंगाने शहराचे महापौर समीर राजूरकर आणि महानगरपालिका आयुक्त अमोल येडगे यांनी आज सलीम अली सरोवराला विशेष भेट देत पाहणी केली.
या भेटीदरम्यान सरोवराच्या सुशोभीकरणासाठी आवश्यक उपाययोजना, विकासकामे आणि प्रकल्पाच्या नियोजनाबाबत चर्चा करण्यात आली. महापौर समीर राजूरकर आणि आयुक्त अमोल येडगे यांनी या प्रकल्पासाठी महानगरपालिकेकडून सर्वतोपरी सहकार्य करण्याचे आश्वासन दिले. तसेच सलीम अली सरोवराला शहरातील सर्वात सुंदर तलाव बनविण्यासाठी प्रयत्न करण्याचा विश्वास त्यांनी व्यक्त केला.
या पाहणीवेळी वंचित बहुजन आघाडीचे गटनेते अफसर खान, स्थायी समिती सदस्य अमित भुईगळ तसेच झोन क्र. १ च्या सभापती करुणा मेघानंद जाधव यांच्यासह संबंधित पदाधिकारी उपस्थित होते. सलीम अली सरोवराच्या सुशोभीकरणामुळे परिसराच्या विकासाला चालना मिळण्यासोबतच नागरिकांसाठी अधिक चांगले पर्यटन व विरंगुळ्याचे ठिकाण उपलब्ध होण्याची अपेक्षा व्यक्त केली जात आहे.
