मुंबई : आयआयटी मुंबई हे दलित विद्यार्थ्यांच्या मृत्यूचे केंद्र बनले आहे. याआधी अनिकेत अंभोरे, दर्शन सोलंकी आता साहिल वाकोडे! आयआयटी मुंबई जातीय छळाचा अड्डा बनलाय. असे म्हणत वंचित बहुजन आघाडी युवा नेते सुजात आंबेडकर यांनी जातीय अत्याचारावर संतप्त प्रतिक्रिया व्यक्त केली.
सुजात आंबेडकर यांनी म्हटले की, आयआयटी मुंबईमध्ये साहिल वाकोडे ह्या 20 वर्षीय विद्यार्थ्यांचा संस्थात्मक खून झालाय. या प्रकरणी त्याच्या आई-वडिलांनी सांगितलेली गोष्ट खूप महत्त्वाची आहे. साहिलला संस्थेकडून सातत्याने छळले जात होते. त्याला जातीयवादाला सामोरे जावे लागले.
देशातील उच्च शैक्षणिक संस्थामध्ये जातीय अत्याचार उच्चतम स्तरावर पोहचला आहे. आयआयटी मुंबईमध्ये ह्यावर्षी 4 घटना घडल्या आहेत, त्यातील 2 घटना ह्या मागील दोन महिन्यातील असल्याचेही त्यांनी नमूद केले.
संस्थेचे डीन आणि संचालक यांचा तातडीने राजीनामा घेण्याची मागणी करत त्यांनी वंचित बहुजन आघाडी ह्या लढ्यात पीडित कुटुंबियांच्या सोबत असल्याचेही स्पष्ट केले.
