२० वर्षांपासून अमृत नरंगलकर यांचा सातत्यपूर्ण पाठपुरावा; पात्र लाभार्थ्यांना १० दिवसांत प्लॉट वाटपाची मागणी
नायगाव : तालुक्यातील मौजे नरंगल येथे सन १९८४ पासून प्रलंबित असलेल्या प्लॉट वाटपाच्या प्रश्नावर वंचित बहुजन आघाडीने आक्रमक भूमिका घेतली आहे. पुनर्वसन वस्तीवाढ गावठाण योजनेअंतर्गत गावातील नागरिकांच्या निवासासाठी संपादित करण्यात आलेल्या जमिनीवरील प्लॉट आजपर्यंत पात्र लाभार्थ्यांना वाटप करण्यात आले नसल्याने नागरिकांमध्ये नाराजी आहे. या पार्श्वभूमीवर नायगाव तहसीलदारांना निवेदन देऊन पात्र लाभार्थ्यांना तातडीने प्लॉट वाटप करण्याची मागणी करण्यात आली.
वंचित बहुजन आघाडीचे जिल्हाध्यक्ष शंकर महाजन यांच्या आदेशानुसार आज नायगाव तहसीलदारांना नरंगल येथील प्रलंबित प्लॉट वाटपाच्या प्रश्नासंदर्भात निवेदन देण्यात आले. यावेळी वंचित बहुजन आघाडीचे जिल्हा उपाध्यक्ष अरुण भद्रे, वंचित बहुजन युवा आघाडीचे जिल्हा उपाध्यक्ष दिपक माधवराव गजभारे घुंगराळेकर, तसेच जिल्हा सल्लागार भगवानराव हानमंते अंचोलीकर यांच्या उपस्थितीत प्रशासनाकडे पात्र लाभार्थ्यांना तातडीने प्लॉट वाटप करण्याची मागणी करण्यात आली.
१९८४ मध्ये नरंगल गावातील नागरिकांच्या निवासासाठी पुनर्वसन वस्तीवाढ गावठाण योजनेअंतर्गत शेतकऱ्यांची जमीन संपादित करण्यात आली होती. संबंधित जमिनीचे गट/सर्वे क्रमांक ४/१, ४/८, ४/९ व २० असून, संपादित जमिनीचा मोबदला संबंधित शेतकऱ्यांना शासनाकडून देण्यात आल्याचे निवेदनात नमूद करण्यात आले आहे. तसेच संबंधित महसूल अभिलेखात शासनाचे नाव नोंदविण्यात आलेले असतानाही तब्बल ४२ वर्षांपासून प्लॉट वाटपाचा प्रश्न प्रलंबित असल्याचे सांगण्यात आले.
नरंगल येथील हा प्रश्न अनेक वर्षांपासून प्रलंबित असून, वंचित बहुजन आघाडीचे जिल्हा महासचिव अमृत नरंगलकर हे मागील तब्बल २० वर्षांपासून या जागेच्या प्रश्नासाठी सातत्याने पाठपुरावा करत आहेत.
संबंधित जमीन, महसूल अभिलेख, पात्र लाभार्थी आणि प्लॉट वाटपाची प्रक्रिया याबाबत त्यांनी वेळोवेळी प्रशासनाकडे प्रश्न उपस्थित करून ग्रामस्थांच्या हक्कासाठी आवाज उठवला आहे. हा प्रश्न केवळ निवेदनापुरता मर्यादित न राहता प्रशासकीय पातळीवर कायमस्वरूपी निकाली निघावा, यासाठी नरंगलकर यांनी विविध स्तरांवर सातत्याने पाठपुरावा केला आहे.
“४२ वर्षे प्रलंबित असलेला प्रश्न आता आणखी लांबवू नये. पात्र नागरिकांना त्यांच्या हक्काची निवासाची जागा मिळणे हा त्यांचा अधिकार आहे. प्रशासनाने सर्व कागदपत्रांची तपासणी करून नियमानुसार तातडीने प्लॉट वाटपाची प्रक्रिया पूर्ण करावी,” अशी भूमिका अमृत नरंगलकर यांनी व्यक्त केली.
पात्र लाभार्थी हक्काच्या जागेपासून वंचित –
जमीन संपादनाला चार दशकांहून अधिक काळ उलटूनही प्लॉट वाटपाचा प्रश्न प्रलंबित असल्याने संबंधित पात्र नागरिकांना आजही आपल्या हक्काच्या निवासाच्या जागेपासून वंचित राहावे लागत आहे. त्यामुळे प्रशासनाने या प्रकरणाची सखोल चौकशी करून जुने महसूल अभिलेख, जमीन संपादनाची कागदपत्रे, लाभार्थ्यांची पात्रता आणि यापूर्वी झालेल्या प्रशासकीय कार्यवाहीची तपासणी करावी, अशी मागणी करण्यात आली आहे.
सदर जमीन शासनाच्या नावावर असताना त्या जागेवर कोणाचे अनधिकृत अतिक्रमण अथवा कब्जा असल्यास त्याचीही चौकशी करण्यात यावी. अनधिकृत अतिक्रमण आढळल्यास संबंधितांवर नियमानुसार कायदेशीर कारवाई करून शासनाच्या जमिनीचे संरक्षण करावे, अशी मागणी निवेदनातून करण्यात आली आहे.
नरंगल येथील प्रलंबित प्लॉट वाटप प्रकरणात प्रशासनाने १० दिवसांच्या आत ठोस कार्यवाही करून पात्र लाभार्थ्यांना प्लॉट वाटपाची प्रक्रिया सुरू करावी, अशी मागणी करण्यात आली आहे. अन्यथा संबंधित लाभार्थी व ग्रामस्थांना सोबत घेऊन तहसील कार्यालयासमोर लोकशाही व संविधानिक मार्गाने तीव्र जनआंदोलन करण्यात येईल, असा इशारा वंचित बहुजन आघाडीच्या वतीने देण्यात आला आहे.
यावेळी वंचित बहुजन आघाडीचे जिल्हा उपाध्यक्ष अरुण भद्रे, जिल्हा सल्लागार भगवानराव हनमंते अंचोलीकर, वंचित बहुजन युवा आघाडीचे जिल्हा उपाध्यक्ष दिपक माधवराव गजभारे घुंगराळेकर, तालुकाध्यक्ष नायगाव साहेबराव कोपरेकर, सतीश वाघमारे, प्रभाकर घंटेवाड, शिवाजी पवार, विलास वाघमारे, नरंगलचे सरपंच प्रतिनिधी दाजीराव हनमंतराव पाटील, मालोजी यमलवाड, बाळासाहेब फुगले, संजय देवके, गौतम हनुमंते, शेख आजम, बळीराम वाघमारे, उद्धव वाघमारे, मनोहर वाघमारे, गौतम वाघमारे, व्यंकटी वाघमारे, अमोल वाघमारे, नारायण वटंबे, ज्ञानेश्वर वाघमारे, संजय वाघमारे, साहेबराव वाघमारे, नागेश वाघमारे, शुभम वाघमारे यांच्यासह संबंधित लाभार्थी व ग्रामस्थ मोठ्या संख्येने उपस्थित होते.
१९८४ पासून रखडलेला नरंगलच्या प्लॉट वाटपाचा प्रश्न आणि त्यासाठी मागील २० वर्षांपासून सुरू असलेला अमृत नरंगलकर यांचा सातत्यपूर्ण पाठपुरावा यामुळे हा विषय पुन्हा एकदा चर्चेत आला आहे. आता महसूल प्रशासन या प्रकरणाची सखोल चौकशी करून पात्र लाभार्थ्यांना त्यांच्या हक्काची जागा मिळवून देण्यासाठी काय ठोस निर्णय घेते, याकडे नरंगल ग्रामस्थांचे लक्ष लागले आहे.
