Tesla Roadster Car : टेस्लाची बहुप्रतीक्षित ‘रोडस्टर’ (Roadster) कार पुन्हा एकदा चर्चेत आली आहे. तिच्या वैशिष्ट्यपूर्ण तंत्रज्ञानामुळे वाहनप्रेमींचे लक्ष वेधले जात आहे. कंपनीचे प्रमुख एलॉन मस्क यांनी २०२८ मध्ये उत्पादनासाठी कार तयार होण्याची शक्यता व्यक्त केली आहे.
या कारचे सर्वाधिक चर्चेत असलेले वैशिष्ट्य म्हणजे ‘कोल्ड गॅस थ्रस्टर्स’ (Cold Gas Thrusters) हे तंत्रज्ञान. या प्रणालीच्या मदतीने कारला हवेत झेप घेण्याची क्षमता मिळू शकते, असा दावा केला जात आहे. वेगवान प्रवेग आणि काही काळ हवेत राहण्यासही हे तंत्रज्ञान मदत करू शकते. कार हवेत उलटी चालवण्यासारख्या प्रात्यक्षिकांचाही उल्लेख होत आहे.
रोडस्टर कार अवघ्या एका सेकंदापेक्षा कमी वेळेत शून्य ते १०० किलोमीटर प्रतितास वेग गाठू शकते, असा दावा करण्यात आला आहे. तसेच, एकदा पूर्ण चार्ज केल्यानंतर ही कार सुमारे १,००० किलोमीटरपर्यंत प्रवास करू शकते, असे सांगितले जात आहे.
रोडस्टरच्या बाह्यरचनेला वेजसारखा आकार देण्यात आला असून, तिचे दरवाजे लॅम्बोर्गिनीच्या कारप्रमाणे वरच्या दिशेने उघडणाऱ्या शैलीचे असल्याचे सांगितले जाते. यामध्ये योक स्टेअरिंग, मोठी टचस्क्रीन आणि वाऱ्याचा रोध नियंत्रित करण्यासाठी अॅक्टिव्ह एरोडायनॅमिक्स यांसारख्या सुविधांचा समावेश असल्याचे सांगितले जात आहे.
अनेक वर्षांपासून चर्चेत असलेल्या या कारच्या उत्पादनाबाबत आता २०२८ हे वर्ष महत्त्वाचे मानले जात आहे.
