कळमनुरी : हिंगोली जिल्ह्यात कळमनुरी येथे स्वातंत्र्यदिनाचे औचित्य साधून शहरातील निवासी मूकबधिर विद्यालयातील विद्यार्थ्यांना वंचित बहुजन युवा आघाडीच्या वतीने फळांचे वाटप करण्यात आले. विद्यार्थ्यांसोबत स्वातंत्र्यदिनाचा आनंद साजरा करत सामाजिक बांधिलकीचा संदेश यावेळी देण्यात आला.
तसेच समाजातील प्रत्येक घटकाप्रती आपली सामाजिक जबाबदारी जपली जावी आणि विद्यार्थ्यांच्या चेहऱ्यावर आनंद फुलावा, या उद्देशाने हा उपक्रम राबविण्यात आला. फळवाटपामुळे विद्यालयातील विद्यार्थ्यांमध्ये उत्साहाचे वातावरण निर्माण झाले.
यावेळी विद्यालयाचे मुख्याध्यापक मोहम्मद जाकरोद्दीन, ए. एस. तांबारे तसेच वसतिगृह काळजीवाहक उपस्थित होते. या उपक्रमात वंचित बहुजन आघाडीचे युवा नेते राजू कांबळे, युवा तालुकाध्यक्ष मोहम्मद असलम, युवा तालुका महासचिव दिनेश पाईकराव, सुशील वाढवे यांच्यासह इतर पदाधिकारी व कार्यकर्ते सहभागी झाले होते. तसेच विद्यालयातील शिक्षक व कर्मचारीही उपस्थित होते.
वंचित बहुजन युवा आघाडी, कळमनुरीच्या वतीने राबविण्यात आलेल्या या उपक्रमाचे उपस्थितांकडून कौतुक करण्यात आले.
