मुंबई: स्वातंत्र्य दिनाचे औचित्य साधून वंचित बहुजन आघाडीच्या कुर्ला मध्यवर्ती कार्यालयात उत्साही वातावरणात स्वातंत्र्यदिन साजरा करण्यात आला. या कार्यक्रमाचे प्रमुख वैशिष्ट्य म्हणजे स्थानिक महिलांच्या हस्ते अधिकृत ध्वजारोहण करण्यात आले.
ध्वजारोहणानंतर उपस्थितांनी एकत्रितपणे भारतीय संविधानाच्या प्रस्तावनेचे (उद्देशिकेचे) सामूहिक वाचन केले. “जय भारत..! जय संविधान..!” च्या घोषणांनी संपूर्ण परिसर दुमदुमून गेला होता. संविधानाची मूल्ये जपण्याचा आणि सामाजिक समतेचा संदेश या प्रसंगी देण्यात आला.
ध्वजारोहण आणि संविधान वाचनाच्या कार्यक्रमानंतर उपस्थितांना अल्पोपहार देण्यात आला आणि कार्यक्रमाची सांगता झाली. या सोहळ्यास पक्षाचे प्रमुख पदाधिकारी स्वप्नील जवळगेकर, मालती वाघ, सुनील अलिंग, आकाश कांबळे, अनिश वाघमारे, अरविंद पवार, राजेश साळवे यांच्यासह अनेक कार्यकर्ते, पदाधिकारी आणि स्थानिक नागरिक मोठ्या संख्येने उपस्थित होते.
