नवी दिल्ली : देशभरात अन्न सुरक्षा नियमांची काटेकोर अंमलबजावणी सुरू असताना भारतीय अन्न सुरक्षा आणि मानक प्राधिकरण (FSSAI) ने पंजाबमधील हर्बल आणि न्यूट्रास्यूटिकल उत्पादने तयार करणाऱ्या डिओर फार्मास्युटिकल्स या कंपनीविरोधात मोठी कारवाई केली आहे. गंभीर अनियमितता आणि अन्न सुरक्षा नियमांचे उल्लंघन आढळल्याने कंपनीचा परवाना रद्द करण्यात आला असून कारखान्यातील सर्व उत्पादन आणि व्यावसायिक कामकाज तात्काळ बंद करण्याचे आदेश देण्यात आले आहेत.
FSSAI च्या विशेष तपासणी पथकाने कारखान्याची अचानक पाहणी केली असता उत्पादन प्रक्रियेत अनेक गंभीर त्रुटी उघडकीस आल्या. उत्पादन विभागातील अस्वच्छता, आवश्यक स्वच्छता मानकांचा अभाव, आरोग्यविषयक नियमांचे पालन न करणे तसेच गुणवत्ता नियंत्रण प्रक्रियेत गंभीर कमतरता असल्याचे तपासात स्पष्ट झाले. अधिकाऱ्यांच्या मते, अशा परिस्थितीत तयार होणाऱ्या उत्पादनांच्या सुरक्षिततेची खात्री देता येत नसल्याने ही कठोर कारवाई करण्यात आली.
FSSAI ने स्पष्ट केले आहे की, कारखान्यातील सर्व त्रुटी दूर करून आवश्यक सुधारणा पूर्ण होईपर्यंत कोणत्याही प्रकारचे उत्पादन, पॅकिंग किंवा व्यावसायिक व्यवहार करता येणार नाहीत. सुधारणा झाल्यानंतर सक्षम अधिकाऱ्यांकडून पुनर्तपासणी केली जाईल आणि समाधानकारक अहवाल मिळाल्यानंतरच उत्पादनाला परवानगी दिली जाईल.
दरम्यान, अन्न सुरक्षा नियमांच्या अंमलबजावणीत FSSAI ने अलीकडच्या काळात आक्रमक भूमिका घेतली आहे. दिशाभूल करणारे आरोग्यविषयक दावे करणाऱ्या कंपन्या, एनर्जी ड्रिंक्स तसेच इतर खाद्यपदार्थ उत्पादकांवरही कारवाईचा बडगा उगारण्यात आला आहे. याशिवाय, ई-कॉमर्स प्लॅटफॉर्मवर विक्री होणाऱ्या खाद्यपदार्थांच्या परवान्यांची आणि गुणवत्तेची खात्री करण्यासाठी संबंधित कंपन्यांना कडक निर्देश देण्यात आले आहेत.
ग्राहकांकडून प्राप्त होणाऱ्या तक्रारी, नियमित तपासण्या आणि अन्न सुरक्षा अधिकाऱ्यांच्या अहवालांच्या आधारे अशा कारवाया सुरू असल्याचे FSSAI ने स्पष्ट केले आहे. अन्न सुरक्षेशी कोणतीही तडजोड सहन केली जाणार नसून नियमांचे उल्लंघन करणाऱ्या कंपन्यांवर भविष्यातही कठोर कारवाई केली जाईल, असा स्पष्ट संदेश या निर्णयातून देण्यात आला आहे.
