नांदेड : नांदेड येथे 21 वे आंबेडकरवादी साहित्य संमेलन उत्साहपूर्ण वातावरणात पार पडले. या संमेलनाला वंचित बहुजन आघाडीच्या राष्ट्रीय नेत्या प्रा. अंजलीताई आंबेडकर यांची प्रमुख उपस्थिती होती. यावेळी त्यांच्या हस्ते विविध क्षेत्रांत उल्लेखनीय कार्य करणाऱ्या मान्यवरांना पुरस्कार प्रदान करण्यात आले.
संमेलनात ज्येष्ठ समाजाभिमुख कलावंत नामदेव व्हटकर यांच्या कार्याचा विशेष गौरव करण्यात आला. भारतरत्न डॉ. बाबासाहेब आंबेडकर यांच्या महापरिनिर्वाणाच्या ऐतिहासिक क्षणांचे चित्रीकरण करून इतिहास जतन करण्यासाठी नामदेव व्हटकर यांनी स्वतःचे घर विकून योगदान दिले होते. त्यांच्या या ऐतिहासिक आणि समाजाभिमुख कार्याचा वारसा जपणारे त्यांचे सुपुत्र डॉ. जयवंत नामदेव व्हटकर यांचा प्रा. अंजलीताई आंबेडकर यांच्या हस्ते सत्कार करण्यात आला.
यावेळी प्रा. अंजलीताई आंबेडकर यांनी उपस्थित साहित्यप्रेमी, अभ्यासक आणि नागरिकांना मार्गदर्शन करताना आंबेडकरवादी विचार, सामाजिक परिवर्तनामध्ये साहित्याचे योगदान आणि नव्या पिढीने वैचारिक चळवळीशी जोडले जाण्याची गरज यावर भाष्य केले. या संमेलनात मोठ्या संख्येने साहित्यप्रेमी, सामाजिक कार्यकर्ते, लेखक, कवी आणि आंबेडकरी चळवळीचे कार्यकर्ते उपस्थित होते. नांदी येथे झालेला हा कार्यक्रम उत्साहपूर्ण वातावरणात पार पडला.
