नागपूर : देशातील प्रतिष्ठित अभियांत्रिकी शिक्षण संस्थांमध्ये प्रवेश मिळवून देणाऱ्या JEE Advanced 2026 परीक्षेचा निकाल सोमवारी जाहीर झाला. या निकालात नागपूरच्या कोविद बूब याने अनुसूचित जाती (SC) प्रवर्गात देशात प्रथम क्रमांक मिळवत उल्लेखनीय यश संपादन केले आहे. कोविदला कॉमन रँक लिस्ट (CRL) मध्ये 82 वा क्रमांक मिळाला असून तो देशातील अव्वल 100 विद्यार्थ्यांमध्ये स्थान मिळवणाऱ्या नागपूरमधील दोन विद्यार्थ्यांपैकी एक ठरला आहे. (JEE Advanced Result 2026)
SC प्रवर्गात देशात प्रथम आलेल्या कोविद बूबने आपल्या यशाचे श्रेय तीन वर्षांच्या सातत्यपूर्ण तयारीला, कठोर परिश्रमाला आणि आपल्या मोठ्या बहिणीच्या मार्गदर्शनाला दिले. त्याची बहीण लहर बूब ही IIT गुवाहाटीची पदवीधर असून सध्या Infosys मध्ये कार्यरत आहे. “माझ्या बहिणीच्या शैक्षणिक प्रवासाने मला प्रेरणा दिली. तिने दिलेल्या मार्गदर्शनामुळे आणि अभ्यासाच्या टिप्समुळे मी संपूर्ण तयारीदरम्यान लक्ष केंद्रित ठेवू शकलो,” असे कोविदने सांगितले.
Also Read : गुजरातमध्ये दोन एसटी बसचा भीषण अपघात: ७ ठार, ३३ हून अधिक जखमी; ॲड. प्रकाश आंबेडकरांकडून दुःख व्यक्त
लहानपणापासून गणिताची आवड असलेल्या कोविदने विविध ऑलिम्पियाड स्पर्धांमध्येही सहभाग घेतला होता. यामुळे त्याची विश्लेषणात्मक क्षमता आणि संकल्पनांची समज अधिक मजबूत झाली. रसायनशास्त्र हा त्याच्यासाठी सर्वात आव्हानात्मक विषय होता. मॉक टेस्टमध्ये झालेल्या चुका सुधारण्यासाठी त्याने सातत्याने प्रयत्न केले. JEE Advanced 2026 परीक्षेसाठी देशभरातून 1 लाख 79 हजार 694 विद्यार्थ्यांनी दोन्ही पेपर दिले होते. त्यापैकी 56 हजार 880 विद्यार्थी पात्र ठरले आहेत. (JEE Advanced Result 2026)
Also Read : बिहार, आसाम आणि पश्चिम बंगालमधील निवडणुकांना आव्हान द्या; नव्या याचिका दाखल करा : ॲड. प्रकाश आंबेडकर
यावर्षी IIT दिल्ली झोनमधील शुबम कुमार याने 360 पैकी 330 गुण मिळवत देशात प्रथम क्रमांक मिळवला. तर आरोही देशपांडे हिने 280 गुणांसह देशातील अव्वल महिला उमेदवार म्हणून मान पटकावला असून तिला CRL मध्ये 77 वा क्रमांक मिळाला आहे. दरम्यान, महाराष्ट्राचा समावेश असलेल्या IIT बॉम्बे झोनमधून 12 हजार 389 विद्यार्थी पात्र ठरले, तर त्यापैकी 120 विद्यार्थ्यांनी देशातील अव्वल 500 क्रमांकांमध्ये स्थान मिळवले आहे. नागपूरच्या कोविद बूब याच्या यशामुळे विदर्भासह संपूर्ण महाराष्ट्राच्या शैक्षणिक क्षेत्रात अभिमानाचे वातावरण निर्माण झाले आहे.
