आर्णी (यवतमाळ) : मुख्यमंत्री माझी लाडकी बहीण योजनेअंतर्गत जिल्ह्यातील अनेक महिलांच्या खात्यात निधी जमा होणे बंद झाल्याच्या तक्रारीनंतर वंचित बहुजन आघाडीने केलेल्या पाठपुराव्यामुळे लाभार्थी महिलांच्या खात्यात पुन्हा पैसे जमा होण्यास सुरुवात झाली आहे. महायुती सरकारने विधानसभा निवडणुकीपूर्वी मोठ्या गाजावाजात मुख्यमंत्री माझी लाडकी बहीण योजना सुरू केली होती. सुरुवातीला काही महिन्यांपर्यंत महिलांच्या खात्यात नियमित निधी जमा होत होता. मात्र, केवायसीसह विविध कारणे पुढे करत अनेक महिलांचे अनुदान थांबविण्यात आल्याच्या तक्रारी समोर आल्या होत्या.
Also Read : धर्माबादमध्ये भीम आर्मीच्या असंख्य कार्यकर्त्यांचा वंचित बहुजन आघाडीत जाहीर प्रवेश
या संदर्भातील तक्रारी वंचित बहुजन आघाडीचे राष्ट्रीय अध्यक्ष ॲड. बाळासाहेब आंबेडकर यांच्याकडे प्राप्त झाल्यानंतर त्यांनी जिल्हाध्यक्ष ॲड. डी. के. दामोधर यांना गावपातळीवर जाऊन महिलांच्या समस्या जाणून घेण्याचे निर्देश दिले. त्यानुसार ॲड. दामोधर यांनी आर्णी तालुक्यातील उमरी, दाभडी, पहूर नस्करी आणि लोणी या गावांचा दौरा करून लाभार्थी महिलांशी संवाद साधला. या दौऱ्यात आर्णी तालुका अध्यक्ष उत्तम मुनेश्वर, जिल्हा सदस्य अजाब मेसेकार, तालुका महासचिव भारत गायकवाड तसेच रवी उंबरे, वाकोडे, खान, धनराज रामटेके, जगताप आणि स्थानिक पदाधिकारी सहभागी झाले होते. महिलांशी झालेल्या चर्चेत अनेक दिवसांपासून त्यांच्या खात्यात योजनेचा निधी जमा होत नसल्याचे निदर्शनास आले. (Ladki Bahin Yojana Scheme)
यानंतर ॲड. दामोधर यांनी 18 मे रोजी संबंधित विभागाच्या अधिकाऱ्यांची भेट घेऊन जिल्ह्यातील सर्व पात्र महिलांना तातडीने निधी वितरित करण्याची मागणी केली. त्यानंतर 19 मे 2026 पासून जिल्ह्यातील लाभार्थी महिलांच्या खात्यात पुन्हा निधी जमा होण्यास सुरुवात झाली आहे.
Also Read : मान्सून तोंडावर; चितलवाडीतील सांडपाणी नाल्यांची तातडीने स्वच्छता करण्याची वंचित बहुजन युवा आघाडीची मागणी
याबाबत बोलताना ॲड. डी. के. दामोधर म्हणाले, “मुख्यमंत्री माझी लाडकी बहीण योजनेच्या निधी वाटपात जिल्ह्यातील मागासवर्गीय महिलांवर अन्याय होत असल्याचे आढळल्यास वंचित बहुजन आघाडीच्या वतीने जिल्हाभर तीव्र आंदोलन छेडले जाईल.” दरम्यान, वंचित बहुजन आघाडीच्या या पाठपुराव्यामुळे गरजू महिलांना योजनेचा लाभ पुन्हा मिळू लागल्याने पक्षाच्या कार्याचे विविध स्तरांतून कौतुक केले जात आहे.
