अकोला : वंचित बहुजन आघाडीच्या नगरसेवकांचे बॅनर्स शहरातील काही भागात लागले आहेत. हे अनेकांनी पाहिले आहे. वंचित बहुजन आघाडीने ट्विट करत हा भाजपा – आरएसएस यांनी विचारपूर्वक कट असल्याचे म्हटले आहे.
वंचित बहुजन आघाडीने कार्यकर्त्यांना संबोधित करत म्हटले की,अकोला शहरात काही ठिकाणी वंचित बहुजन आघाडीच्या नगरसेवकांचे बॅनर्स लागले आहेत. हे अनेकांनी पाहिले असेल. हा भाजपा-आरएसएसने एक विचारपूर्वक रचलेला कट आहे. अत्यंत जातीयवादी, द्वेषपूर्ण व्यक्ती टी. राजाच्या स्वागताचे लावलेले बॅनर्स हे वंचित बहुजन आघाडीच्या नगरसेवकांच्या सहमती शिवाय लावले गेले आहेत. ज्यामुळे त्यांची बदनामी केली जाऊ शकेल तसेच मतदारांमध्ये संभ्रम निर्माण केला जावा.
वंचित बहुजन आघाडी टी राजा सारख्या , द्वेषपूर्ण, जातीयवादी व्यक्ती, ज्यावर सोशल मीडियाने देखील प्रतिबंध केला आहे. टी राजा अत्यंत विखारी, विकृत अशी व्यक्ती आहे, याचे समर्थन आम्ही कधी करू शकत नाही. वंचित बहुजन आघाडीच्या नेत्यांना बदनाम करण्याचा हा डाव असल्याचे वंचितने म्हटले.
वंचित बहुजन आघाडी सातत्याने आरएसएस-भाजपाविरोधात लढा देत आहे. औरंगाबाद येथे देशाच्या इतिहासात पहिल्यांदा आरएसएस कार्यलयावर मोर्चा वंचित बहुजन आघाडीने काढला होता. नागपूर येथे आरएसएसच्या मुख्य कार्यलयावर देखील आम्ही मोर्चा काढला होता. त्यामुळे आरएसएसच्या विरोधातील लढाई आम्हीच लढतोय.असेही वंचित बहुजन आघाडीकडून स्पष्ट करण्यात आले.
वंचित बहुजन आघाडीचे नगरसेवक निलेश देव, सुनील इल्लानी या आमच्या नेत्यांनी आयोजकांना जाब विचारला त्यावर आयोजकांनी मान्य केले की, त्यांनी परस्पर फोटो टाकलेत. त्यानंतर वंचित बहुजन आघाडीच्या कार्यकर्त्यांनी आणि नगरसेवक निलेश देव, सुनील इल्लानी हे सर्व बॅनर्स फाडले आहेत. याविरोधात आम्ही कायदेशीर कारवाई करणार असल्याचेही वंचितने सांगितले.
