अकोला : अकोल्यात आज श्री एकवीरा मैदान, माढवनगर गोरक्षण रोड येथे हिंदू राष्ट्र समन्वय समितीच्या वतीने आयोजित करण्यात आलेल्या सभेला टी. राजा सिंग यांना परवानगी दिल्याबद्दल वंचित बहुजन आघाडीच्या अकोला जिल्हा पदाधिकारी आणि कार्यकर्त्यांनी तीव्र शब्दांत विरोध नोंदवला आहे.
याबाबत पोलीस अधीक्षक, अकोला यांना दिलेल्या निवेदनात म्हटले आहे की, टी. राजा सिंग हे धार्मिक तेढ निर्माण करणारे जातीवादी व्यक्तिमत्व असून त्यांच्या द्वेषपूर्ण भाषणांमुळे विविध समुदायांमध्ये वैमनस्य वाढण्याची शक्यता असते. त्यांच्या विरोधात ‘द्वेषपूर्ण भाषण आणि वैमनस्य वाढवणे’ यांसारख्या आरोपांखाली अनेक एफआयआर दाखल आहेत.
तसेच सार्वजनिक सुव्यवस्थेच्या कारणास्तव त्यांच्यावर ‘तेलंगणा धोकादायक कृत्ये प्रतिबंधक कायदा’ अंतर्गत कारवाईही करण्यात आली असल्याचे नमूद करण्यात आले आहे. अशा पार्श्वभूमीवर, अकोल्यात त्यांच्या सभेला परवानगी कशी देण्यात आली, असा सवाल वंचित बहुजन आघाडीने उपस्थित केला आहे.
तसेच या कार्यक्रमामुळे शहरात कोणताही जातीय तणाव, संघर्ष किंवा हिंसाचार उद्भवल्यास त्याची संपूर्ण जबाबदारी जिल्हा दंडाधिकारी आणि पोलीस अधीक्षक यांच्यावर राहील, असा इशाराही देण्यात आला आहे. या सभेचा आणि प्रशासनाच्या निर्णयाचा वंचित बहुजन आघाडीच्या अकोला शहर पदाधिकारी व कार्यकर्त्यांनी तीव्र निषेध केला आहे.
