आंध्र प्रदेश : मार्कापुरम जिल्ह्यातील रायवरम परिसरात गुरुवारी पहाटे एक भीषण अपघात घडला. खासगी ट्रॅव्हल्सची बस आणि डंपर यांच्यात झालेल्या धडकेनंतर बसला आग लागून 13 प्रवाशांचा होरपळून मृत्यू झाला.
मिळालेल्या माहितीनुसार, हरिकृष्णा ट्रॅव्हल्सची बस तेलंगणातील निर्मल येथून नेल्लोरकडे जात होती. पहाटे सुमारे सहाच्या सुमारास हा अपघात झाला. अपघातानंतर बसला लागलेली आग विझवण्यासाठी अग्निशमन दलाला सुमारे तीन तासांची कसरत करावी लागली. (Andhra Pradesh Bus Inferno)
मार्कापुरमचे पोलीस अधीक्षक व्ही. हर्षवर्धन राजू यांनी सांगितले की, या दुर्घटनेत डंपर चालकासह 22 जण जखमी झाले असून त्यांच्यावर रुग्णालयात उपचार सुरू आहेत. अपघाताच्या वेळी बसमध्ये एकूण 35 प्रवासी होते. घटनेचे नेमके कारण शोधण्यासाठी तपास सुरू आहे.
याआधी 25 डिसेंबर 2025 रोजी कर्नाटकातील चित्रदुर्ग येथेही असाच भीषण अपघात झाला होता. एका भरधाव लॉरीने डिव्हायडर ओलांडून समोरून येणाऱ्या ‘सीबर्ड ट्रान्सपोर्ट’च्या स्लीपर बसला धडक दिली. (Andhra Pradesh Bus Inferno)
या धडकेनंतर बसला आग लागली आणि त्यात 6 जण जिवंत जळाले. मृतांमध्ये 4 महिला, एक लहान मूल आणि लॉरी चालकाचा समावेश होता. अपघाताच्या वेळी बहुतांश प्रवासी झोपेत असल्याने त्यांना बाहेर पडण्याची संधी मिळाली नाही. दोन्ही घटनांमुळे रस्ते सुरक्षेबाबत पुन्हा एकदा गंभीर प्रश्न उपस्थित झाले आहेत.
