गुलाब बर्डे यांच्या जागी मालती थविल यांना उमेदवारी
मुंबई : लोकसभा निवडणुकीच्या रणधुमाळीत रंग भरत असताना पहिल्या टप्प्यातील मतदान प्रक्रिया पूर्ण झाली आहे. येत्या 26 तारखेला दुसऱ्या टप्प्यातील मतदान होणार आहे.
दरम्यान, दिंडोरी या मतदार संघात वंचित बहुजन आघाडीने गुलाब मोहन बर्डे यांना उमेदवारी जाहीर केली होती. मात्र, आता त्यांच्या जागी मालती शंकर थविल यांना उमेदवारी देण्यात आली आहे. वंचित बहुजन आघाडीच्या राज्य कार्यकारिणीने हा निर्णय घेतला आहे.
गुलाब बर्डे यांची तब्बेत काही दिवसांपासून बरी नसल्यामुळे त्यांनी निवडणुकीतून माघार घेण्याची विनंती केली होती. त्यामुळे या मतदार संघात कोकणा आदिवासी समाजातील महिलेला उमेदवारी देवून वंचितने निवडणुकीत चुरस निर्माण केली आहे. मतदार कुणाच्या बाजूने कौल देतात हे पाहणे महत्वाचे ठरणार आहे.
