Pune Rain Update : मुसळधार पाऊसामुळे शहरात मोठ्या प्रमाणावर वाहतूक कोंडी झाली आहे. पुणे आणि पिंपरी शहरात आज पहाटेपासून जोरदार पाऊस झाला आहे. दोन्ही शहरात रस्ते, जनजीवन विस्कळीत झाले.
जोरदार पावसामुळे अनेक भागांत वाहतून कोंडीचा सामना करावा लागत आहे. औंध, पाषाण, बाणेर रस्ता, बोपोडी, महाळुंगे, सूसगाव येथे संततधार पाऊस झाल्याने अनेक भागात पाणी साचले आहे. त्यामुळे वाहतूक संथ गतीने सुरु आहे.
हिंजवडीमधील रस्त्यांना वाटरपार्कचे स्वरुप आले असून तेथील नालेसफाई आणि पाण्याचा निचरा याचे व्यवस्था आहे की नाही अशी शंका लोक व्यक्त करत आहेत.
हिंजवडी फेज-3, फेज-2 मध्ये अनेक भागांत जोरदार पावसामुळे मोठ्या प्रमाणात पाणी साठले असून आयटी पार्कमध्ये गुडघ्याच्या वरती पाणी आले आहे. हिंजवडीत पाऊस नसताना त्या भागात नेहमीच मोठ्या प्रमाणात वाहतूक कोंडी होत असते.
मात्र, आता पावसामुळे तेथील परिस्थिती बिकट झाली आहे. तेथील रस्त्यांना नद्यांचे स्वरुप आल्याचे दिसून येत आहे. यामुळे बरेच अनेक कर्मचाऱ्यांना वेळेत कामात पोहोचता आले नाही. तर अनेकांनी वर्क फ्रॉम करणे पसंत केले.
