पुणे: गॅस तुटवड्यामुळे खाद्यान्न साखळी विस्कळीत; ऑनलाइन फूड ऑर्डर्स स्वीकारणे तात्पुरते बंद

पुणे : गॅस सिलिंडर टंचाईमुळे खानावळींसह ऑनलाइन फूड डिलिव्हरी सेवांवर परिणाम देशातील युद्धजन्य परिस्थितीचा परिणाम आता सर्वसामान्यांच्या दैनंदिन जीवनावर जाणवू लागला आहे. गॅस सिलिंडरच्या टंचाईमुळे पुण्यातील खानावळी, छोटे हॉटेल्स आणि क्लाउड किचन अडचणीत सापडले असून त्याचा फटका ऑनलाइन फूड डिलिव्हरी सेवांनाही बसू लागला आहे.

व्यावसायिक गॅस सिलिंडरचा तुटवडा निर्माण झाल्याने आणि काळ्या बाजारात त्यांचे दर मोठ्या प्रमाणात वाढल्याने अनेक लहान हॉटेल्स व क्लाउड किचनना स्वयंपाक सुरू ठेवणे कठीण झाले आहे. त्यामुळे पुण्यासह देशभरातील काही ठिकाणी ऑनलाइन ऑर्डर स्वीकारणे तात्पुरते बंद करण्याचा निर्णय अनेक व्यावसायिकांनी घेतला आहे. )Pune Food Supply Hit by LPG Shortage)

पुणे हे शिक्षण आणि उद्योग क्षेत्राचे महत्त्वाचे केंद्र असल्याने येथे मोठ्या प्रमाणावर विद्यार्थी आणि आयटी क्षेत्रातील कर्मचारी वास्तव्यास आहेत. घरापासून दूर राहणाऱ्या या वर्गासाठी खानावळी आणि ऑनलाइन फूड डिलिव्हरी हा प्रमुख पर्याय असतो. मात्र, खानावळी बंद झाल्यामुळे अनेकांनी ऑनलाइन जेवण मागवण्याकडे वळले असताना, आता त्या सेवांवरही परिणाम होत असल्याने त्यांच्यासमोर अडचणी निर्माण झाल्या आहेत. (Pune Food Supply Hit by LPG Shortage)

याचा परिणाम फक्त ग्राहकांवरच नव्हे, तर फूड डिलिव्हरी करणाऱ्या पार्टनर्सवरही होत आहे. ऑर्डर्स कमी झाल्याने त्यांच्या उत्पन्नावरही मोठा परिणाम होत असल्याची स्थिती निर्माण झाली आहे. गॅस सिलिंडर टंचाईमुळे पुण्यातील फूड व्यवसायाची संपूर्ण साखळीच विस्कळीत होण्याची शक्यता व्यक्त केली जात आहे.