रायगड : पनवेल प्रादेशिक परिवहन कार्यालयात ऑटो रिक्षा आणि मीटर टॅक्सी चालकांच्या कामकाजासाठी येणाऱ्या अर्जदारांना “धर्मवीर आनंद दिघे साहेब महाराष्ट्र ऑटो रिक्षा आणि मीटर टॅक्सी चालक कल्याणकारी मंडळ, मुंबई” याचे सभासदत्व घेणे बंधनकारक असल्याची नोटीस लावण्यात आल्याची माहिती वंचित बहुजन आघाडीला मिळाल्याने या प्रकरणाची पक्षाने गंभीर दखल घेतली आहे.
नोटीसनुसार संबंधित मंडळाचे सभासदत्व घेतल्याची पावती जोडल्याशिवाय कोणतेही अर्ज स्वीकारले जाणार नाहीत, असे नमूद करण्यात आल्याचे समोर आले आहे. या पार्श्वभूमीवर वंचित बहुजन आघाडीच्या शिष्टमंडळाने पनवेल प्रादेशिक परिवहन अधिकारी जयंत चव्हाण यांची भेट घेऊन या विषयावर सविस्तर चर्चा केली आणि निवेदन सादर केले. तसेच आरटीओ कार्यालयातील संबंधित क्लार्क यांच्याशी संवाद साधत प्रत्यक्ष परिस्थितीची पाहणीही करण्यात आली. (Panvel RTO Auto Taxi Drivers)
यावेळी प्रादेशिक परिवहन अधिकारी जयंत चव्हाण यांनी स्पष्ट केले की, संबंधित कल्याणकारी मंडळ रिक्षा व टॅक्सी चालकांसाठी फायदेशीर ठरावे या उद्देशाने सभासदत्वाबाबत माहिती देण्याचा प्रयत्न सुरू आहे. मात्र कोणत्याही चालकावर सभासदत्व घेण्यासाठी जबरदस्ती करण्यात आलेली नाही. कार्यालयात फलक लावण्यात आले असले तरी चालकांवर दबाव आणू नये, तसेच मंडळाची माहिती आणि त्याचे फायदे समजावून सांगावेत, असे तात्काळ निर्देश संबंधित अधिकाऱ्यांना देण्यात आल्याचे त्यांनी सांगितले.
वंचित बहुजन आघाडीच्या शिष्टमंडळामध्ये पनवेल महानगर अध्यक्ष आनंद गायकवाड, प्रवक्ते कुमार मेटांगे, महासचिव अविनाश अडागळे, महासचिव संतोष मुजमुले तसेच रिक्षा युनियन नेते बाळा जगदाळे उपस्थित होते. (Panvel RTO Auto Taxi Drivers)
दरम्यान, कोणत्याही चालकावर जबरदस्ती करून कोणत्याही संस्थेचे सभासदत्व लादणे योग्य नसल्याचे वंचित बहुजन आघाडीने स्पष्ट केले असून चालकांच्या हक्कांचे संरक्षण करण्यासाठी पक्ष सातत्याने पाठपुरावा करणार असल्याचेही सांगण्यात आले.
