नागपूर : दिल्लीतील जंतर-मंतर येथे विद्यार्थ्यांच्या आंदोलनादरम्यान झालेल्या कथित पोलिस लाठीचार्जच्या निषेधार्थ आणि विद्यार्थ्यांना समर्थन दर्शविण्यासाठी वंचित बहुजन आघाडीचे राष्ट्रीय नेते ॲड. बाळासाहेब आंबेडकर यांनी दिलेल्या महाराष्ट्र बंदच्या हाकेला नागपुरात उत्स्फूर्त प्रतिसाद मिळाला.
आंदोलनाची सुरुवात संविधान चौकातील विश्वरत्न डॉ. बाबासाहेब आंबेडकर यांच्या पूर्णाकृती पुतळ्याला अभिवादन करून करण्यात आली. त्यानंतर संविधान चौक ते बर्डी असा मोर्चा काढण्यात आला. मोर्चादरम्यान पोलिसांनी आंदोलनकर्त्यांना ताब्यात घेऊन वाहनांमध्ये बसविल्याची माहिती आयोजकांनी दिली.
वंचित बहुजन आघाडीच्या म्हणण्यानुसार, दिल्लीतील जंतर-मंतर येथे 20 जुलै रोजी विद्यार्थ्यांच्या आंदोलनावर झालेल्या कथित लाठीचार्जच्या निषेधार्थ हे आंदोलन करण्यात आले. विद्यार्थ्यांवरील दडपशाहीचा निषेध करत राज्यभर महाराष्ट्र बंदचे आवाहन करण्यात आले होते. नागपूर जिल्ह्यातील सर्व तालुके तसेच शहरातील सहाही विधानसभा मतदारसंघांत बंद आंदोलनात कार्यकर्ते, पालक, विद्यार्थी आणि नागरिकांनी सहभाग नोंदविला.
या आंदोलनात जिल्हाध्यक्ष अजय सहारे, अनिरुद्ध मडके, महानंदा राऊत, शहर महासचिव मनोज सुटे, राहुल दहिकर, सी.सी. वासे, ॲड. सुजाता वाल्देकर, भगवान भोंडे, प्रशांत नगरकर, वैभव येवले, शुभम वाहने, राजेश जंगले, किशोर धोटे, प्रिन्स शामकुळे, ॲड. नलिनी खांडेकर, वर्षा बनसोड, विजय बागडे, किरण देवरे, शाहनवाज मलिक यांच्यासह अनेक पदाधिकारी, कार्यकर्ते, विद्यार्थी आणि नागरिक मोठ्या संख्येने उपस्थित होते.
