नागपूर : नागपूरमध्ये बारावीच्या परीक्षेदरम्यान गंभीर गैरप्रकार उघडकीस आला आहे. विज्ञान शाखेच्या फिजिक्स आणि केमिस्ट्री विषयांचे प्रश्नपत्रिके परीक्षेपूर्वीच सोशल मीडियावर फिरत असल्याची धक्कादायक माहिती समोर आली आहे. या प्रकरणी नागपूर येथील सदर पोलिस ठाणे येथे गुन्हा नोंदवण्यात आला आहे.
मिळालेल्या माहितीनुसार, काही विद्यार्थ्यांनी व्हॉट्सॲपवर खासगी गट तयार करून प्रश्नपत्रिका शेअर केल्याचा संशय पोलिसांना होता. गुरुवारी झालेल्या केमिस्ट्रीच्या पेपरपूर्वीच संबंधित प्रश्नपत्रिका विद्यार्थ्यांच्या गटावर प्रसारित झाल्याचे तपासात उघड झाले. हा प्रकार सदर परिसरातील सेंट उर्सुला परीक्षा केंद्र येथे समोर आला.
परीक्षेदरम्यान एका विद्यार्थिनीने वारंवार प्रसाधनगृहात जाण्यामुळे केंद्रातील निरीक्षकांना संशय आला. तपासणीदरम्यान तिच्याकडून स्मार्टफोन जप्त करण्यात आला. मोबाईल तपासल्यावर व्हॉट्सअॅप गटात परीक्षेच्या तासाभरापूर्वी प्रश्नपत्रिका पाठवण्यात आल्याचे स्पष्ट झाले.
केंद्रप्रमुखांनी तत्काळ पोलिसांना कळवले. पुढील चौकशीत १५ विद्यार्थ्यांचा गट तयार करून पेपर शेअर केल्याचे निष्पन्न झाले. मोबाईलमध्ये व्हॉट्सअॅपवर १५ विद्यार्थ्यांचा एक ग्रुप तयार करण्यात आल्याचे आढळून आले आहे. दोन्ही विद्यार्थिनीची चौकशी केली असता खासगी शिकवणी वर्गातील एका शिक्षकाने पैसे घेऊन पेपर फोडल्याची माहिती त्यांनी दिली. उर्वरित १३ विद्यार्थी शहरातील विविध केंद्रांवर परीक्षा देत असल्याचे समोर आले आहे.
या प्रकरणाचा अधिक तपास सुरू असून प्रश्नपत्रिका फुटीमागील संपूर्ण साखळी उघड करण्यासाठी पोलिसांकडून प्रयत्न सुरू आहेत. शिक्षण क्षेत्रातील या प्रकारामुळे विद्यार्थ्यांमध्ये आणि पालकांमध्ये चिंता व्यक्त केली जात आहे.
