औरंगाबाद : औरंगाबाद येथील देवगिरी महाविद्यालय आणि छत्रपती महाविद्यालयाकडून मागासवर्गीय विद्यार्थ्यांकडून अनाधिकृतपणे शुल्क वसूल केले जात असल्याच्या तक्रारीची समाज कल्याण विभागाने गंभीर दखल घेतली आहे. या प्रकरणी समाज कल्याण सहाय्यक आयुक्तांनी मराठवाडा शिक्षण प्रसारक मंडळाच्या दोन्ही महाविद्यालयांना कारणे दाखवा नोटीस बजावली असून, शासनाच्या नियमांचे उल्लंघन केल्यास कठोर कारवाईचा इशारा दिला आहे.
शासनाच्या नियमानुसार, मागासवर्गीय विद्यार्थ्यांना शैक्षणिक शुल्कात सवलत असतानाही देवगिरी महाविद्यालयाकडून अनधिकृतपणे शुल्क वसुली केली जात असल्याचा आरोप वंचित बहुजन युवा आघाडीने केला होता. याविरोधात युवा आघाडीच्या वतीने समाज कल्याण सहाय्यक आयुक्तांना निवेदन देण्यात आले होते. तसेच, नुकतेच देवगिरी महाविद्यालयाच्या प्रांगणात शेकडो विद्यार्थ्यांच्या उपस्थितीत भव्य आंदोलनही करण्यात आले होते. (Vanchit bahujan aghadi)
विद्यार्थ्यांचा रोष आणि पुराव्यांची दखल घेत समाज कल्याण विभागाने महाविद्यालयाला आदेशित केले आहे की, यानंतर कोणत्याही मागासवर्गीय विद्यार्थ्यांकडून अनाधिकृत शुल्क वसुली करू नये. अशी वसुली करणे ही शासन निर्णयाची (जीआर) पायमल्ली आहे. या नियमाचे उल्लंघन झाल्यास महाविद्यालयावर कायदेशीर कारवाई प्रस्तावित केली जाईल.
अॅट्रॉसिटी अंतर्गत गुन्हा नोंदवण्याचा इशारा
या संदर्भात वंचित बहुजन युवा आघाडीचे पश्चिम शहर अध्यक्ष राहुल मकासरे यांनी आक्रमक पवित्रा घेतला आहे. त्यांनी म्हटले आहे की, जर यापुढेही महाविद्यालयाने मागासवर्गीय विद्यार्थ्यांची लूट थांबवली नाही, तर महाविद्यालयाला कुलूप ठोकले जाईल. तसेच, अनुसूचित जाती आणि अनुसूचित जमाती (अत्याचार प्रतिबंधक) कायदा, १९८९ (Atrocity Act) अंतर्गत संबंधित प्रशासनावर गुन्हा नोंदवण्यात येईल.
