जालना: जालना तालुक्यातील पुणेगाव येथील पारधी आदिवासी समाजातील महिला सोनाली चव्हाण यांना झालेल्या मारहाण प्रकरणी न्याय मागण्यासाठी गेलेल्या पीडितेला पोलीस प्रशासनाकडून अपमानस्पद वागणूक मिळाल्याचा खळबळजनक प्रकार समोर आला आहे. या घटनेच्या निषेधार्थ वंचित बहुजन आघाडी आणि फाशी पारधी आदिवासी संघटनेच्या वतीने जिल्हाधिकारी कार्यालयासमोर धरणे आंदोलन करण्यात आले.
मिळालेल्या माहितीनुसार, पुणेगाव येथील सोनाली चव्हाण यांना काही व्यक्तींनी मारहाण केली होती. याप्रकरणी तक्रार देण्यासाठी त्या तालुका पोलीस स्टेशनला गेल्या असता, पोलीस निरीक्षक संतोष साबळे यांनी ‘पारधी जमातच गुन्हेगार आहे, तुमचा गुन्हा दाखल होऊ शकत नाही’ असे म्हणून जातीवाचक शब्द वापरले आणि त्यांना पोलीस ठाण्यातून हाकलून देण्यात आले. (Jalna news)
या प्रकारामुळे संतप्त झालेल्या वंचित बहुजन आघाडीच्या पदाधिकाऱ्यांनी पोलीस उपअधीक्षक अनंत कुलकर्णी यांची भेट घेऊन सविस्तर चर्चा केली. यावेळी मारहाण करणाऱ्या आरोपींसह, कर्तव्यात कसूर करून जातीवाचक बोलणाऱ्या पोलीस निरीक्षक संतोष साबळे यांच्यावर तात्काळ कठोर गुन्हा दाखल करण्याची मागणी करण्यात आली.
माध्यमांशी बोलताना वंचित बहुजन आघाडीचे मराठवाडा उपाध्यक्ष दिपक डोके म्हणाले की, “रक्षणकर्त्या पोलिसांनीच जर अशा प्रकारे जातीवाचक भेदभाव केला, तर सामान्य जनतेने कोणाकडे जायचे? जर येत्या दोन दिवसांत संबंधित पोलीस निरीक्षक आणि आरोपींवर कारवाई झाली नाही, तर पोलीस उपअधीक्षक कार्यालयावर वंचित बहुजन आघाडीच्या वतीने तीव्र मोर्चा काढला जाईल.” (Jalna news)
या आंदोलनात फाशी पारधी आदिवासी संघटनेचे अध्यक्ष दिपू पवार, वंचितचे जिल्हा संघटक राजेंद्र खरात, विलास भिंगारे, सत्यपाल गायकवाड, गौतम काकडे, पीडित सोनाली चव्हाण, निला काकडे, संजय आदमाने, चंद्रा पवार, राधा भोसले, आरकेस्ट्रा चव्हाण, पुजा चव्हाण, प्रशांत सोनवणे, गोपाल पवार यांच्यासह शेकडो महिला आणि कार्यकर्ते मोठ्या संख्येने उपस्थित होते.
