नवी दिल्ली : भारतीय महिला हॉकी संघाने ऑकलंड येथे झालेल्या FIH महिला हॉकी नेशन्स कपच्या अंतिम सामन्यात यजमान न्यूझीलंडचा 2-0 असा पराभव करत शानदार विजेतेपद पटकावले. या विजयासह भारताने पुढील हंगामातील प्रतिष्ठेच्या FIH महिला प्रो लीगमध्ये प्रवेशही निश्चित केला आहे.
अंतिम सामन्यात भारतीय संघाने सुरुवातीपासूनच आक्रमक खेळाचे प्रदर्शन केले. सामन्याच्या चौथ्या मिनिटालाच नवनीत कौर हिने सुंदर फील्ड गोल करत भारताचे खाते उघडले. या गोलमुळे भारताला 1-0 अशी महत्त्वपूर्ण आघाडी मिळाली. पहिल्या सत्राच्या अखेरीस सुनेलिता टोप्पो हिने 15व्या मिनिटाला आणखी एक गोल करत भारताची आघाडी 2-0 अशी भक्कम केली. त्यानंतर भारतीय बचावफळीने उत्कृष्ट कामगिरी करत न्यूझीलंडच्या आक्रमणांना यशस्वीपणे रोखले आणि यजमान संघाला सामन्यात पुनरागमनाची कोणतीही संधी दिली नाही. (FIH Nations Cup 2026)
Also Read : जायकवाडी वसाहत पंचशील ध्वज अवमान प्रकरणी २३ जून रोजी वंचितचा जनआक्रोश मोर्चा
अंतिम सामन्यात प्रभावी खेळ करणाऱ्या लालरेम्सियामी हिला ‘प्लेयर ऑफ द मॅच’ पुरस्काराने गौरविण्यात आले. तर स्पर्धेत भारताच्या दीपिका आणि अमेरिकेच्या ॲशली सेसा यांनी प्रत्येकी सहा गोल करत संयुक्तपणे सर्वोच्च गोलकर्त्यांचा मान पटकावला. भारतासाठी हे नेशन्स कपमधील दुसरे विजेतेपद ठरले. यापूर्वी 2022 मध्ये झालेल्या पहिल्या स्पर्धेतही भारतीय संघाने जेतेपद मिळवले होते. विशेष म्हणजे, यंदाच्या स्पर्धेत भारतीय संघाने एकही सामना न गमावता अपराजित विजेतेपदाचा मान मिळवला. (FIH Nations Cup 2026)
Also Read : जागतिक सत्तासंघर्षाचे नवे पर्व : जी-७, चीन आणि बदलते जग
स्पर्धेतील साखळी फेरीत भारताने अमेरिका (3-2), जपान (2-1) आणि उरुग्वे (3-2) यांचा पराभव केला. उपांत्य फेरीत चिलीवर 6-0 अशी दणदणीत मात केल्यानंतर अंतिम फेरीत न्यूझीलंडलाही नमवत भारतीय महिलांनी सुवर्णयश संपादन केले. या ऐतिहासिक यशानंतर हॉकी इंडियाने संघासाठी विशेष रोख पारितोषिकांची घोषणा केली आहे. विजेत्या संघातील प्रत्येक खेळाडूला 3 लाख रुपये, तर प्रशिक्षक आणि सपोर्ट स्टाफमधील प्रत्येक सदस्याला 1.5 लाख रुपये देण्यात येणार आहेत.
