– संजीव चांदोरकर
सर, अभिनंदन
एवढे सगळे होऊन देखील आपल्या देशाची जीडीपी जगात सर्वात वेगाने वाढणारी ठरणार आहे म्हणे.
एवढे सगळे होऊन देखील शेयर मार्केट पून्हा एकदा वधारू लागले आहे
एवढे सगळे होऊन देखील कर संकलन वाढत आहे
पण सर,
आम्हाला हे देखील कधीतरी सांगा की सर्व जगात भारताची जीडीपी वाढली सर्वात जास्त वेगाने तर …..
कोट्यवधी शाळा कॉलेजमधील मुला / मुलींच्या शिक्षणाची वाट लागली आहे, हजारो सरकारी शाळा दरवर्षी बंद केल्या जात आहेत ती वेगाने सुधारेल काय ?
एवढे तरुण आज कॉलेजचे शिक्षण घेत आहेत. या उच्च शिक्षित तरुणांना हवेतसे रोजगार मिळत नाहीत. काही शे जागा असतील तर काही लाख अर्ज येत असतात. तर अर्थव्यवस्था वेगाने वाढली की त्यांना वेगाने रोजगार मिळतील काय , सर?
संघटित क्षेत्रातील कामगारांचे वेतनमान किंवा असंघटित क्षेत्रातील गिग वर्कर्सचे वेतन किती आणि किती वेगाने वाढेल?
अर्थव्यवस्था वेगाने वाढली की देशातील कोट्यवधी सामान्य कुटुंबातील महिलांच्या रक्तातील हिमोग्लोबीन किती वेगाने किती टक्क्यांनी वाढेल ? आणि कोट्यवधी गरीब कुटुंबातील लहान मुलामुलींचा बॉडी मास रेशो ?
देशातील अनेक भागातील भूगर्भ पाण्याची पातळी ५०० फूट खाली गेली आहे ती किती वेगाने किती फूट वर येईल?
आत्महत्या करणाऱ्या शेतकऱ्यांची संख्या येत्या काही वर्षात किती वेगाने कमी होईल
अगदी सरकारी आरोग्य विमा कव्हर घेतलेल्या नागरिकांना ५० टक्के खर्च खिशातून करावा लागतोय ; त्यासाठी कर्जे काढावी लागत आहेत ; ते प्रमाण कसे आणि किती कमी होईल
पोस्टची लांबी वाढेल म्हणून प्रश्न वाढवत नाही
सर , एक विचारू का ?
अर्थव्यवस्था किती छान काम करत आहे हे तुम्ही हाय व्होल्टेज प्रचारातून सांगत असता. त्यासाठी आकडेवारी, अगदी नाणेनिधीची साक्ष काढता. ते सर्व खोटे कसे म्हणायचे
पण हे सर्व सिद्ध करणाऱ्या , तुमच्या गुंतागुंतीच्या अमूर्त मॅथेमॅटिकल मॉडेल मध्ये आमच्या मूर्त / डायरेक्ट हिताचे देखील काही पॅरामीटर्स घाला की जरा
आणि सांगा जीडीपी (आणि तत्सम मॅक्रो इंडिकेटर्सचा) वेगाने वाढण्याचा आणि आमच्या दैनंदिन आयुष्याची गुणवत्ता वेगाने सुधारण्याचा नक्की काय संबंध आहे, मुळात असतो की नसतो ते जरा समजावून सांगा सर
