गुवाहाटी: भारतीय हवाई दलाचे (IAF) सामर्थ्य मानले जाणारे सुखोई-३० एमकेआय हे लढाऊ विमान आसाममध्ये कोसळल्याची धक्कादायक घटना घडली आहे. या भीषण अपघातात हवाई दलाचे दोन तरुण अधिकारी, स्क्वॉड्रन लीडर अनुज आणि फ्लाईट लेफ्टनंट पूर्वेश दुरगकर यांनी देशासाठी आपले प्राण अर्पण केले.
गुरुवारी सायंकाळी आसाममधील जोरहाट हवाई तळावरून या विमानाने नियमित प्रशिक्षण मोहिमेसाठी उड्डाण केले होते. रात्री ७:४२ वाजता या विमानाचा रडारशी असलेला संपर्क तुटला आणि विमान बेपत्ता झाले. त्यानंतर तातडीने शोधमोहीम राबवण्यात आली. आसाममधील कार्बी आंगलाँग जिल्ह्यातील बोकाजन उपविभागातील चोकीहोला जंगल परिसरात हे विमान कोसळले. स्थानिकांनी दिलेल्या माहितीनुसार बचाव पथक घटनास्थळी पोहोचले, मात्र तोपर्यंत दोन्ही वैमानिकांनी अखेरचा श्वास घेतला होता.
भारतीय हवाई दलाने एक्स या सोशल मीडिया प्लॅटफॉर्मवरून या घटनेची अधिकृत माहिती दिली. हवाई दलाने आपल्या निवेदनात म्हटले आहे की, या कठीण प्रसंगी हवाई दलातील सर्व कर्मचारी शोकाकुल कुटुंबांच्या पाठीशी खंबीरपणे उभे आहेत. देशाने दोन कर्तबगार वैमानिक गमावले असून, त्यांच्या सर्वोच्च बलिदानाचा आम्हाला अभिमान आहे.
रशियन बनावटीचे सुखोई-३० एमकेआय हे दोन आसनी, बहुउद्देशीय लढाऊ विमान भारतीय हवाई दलाचा कणा मानले जाते. २००० च्या दशकापासून हे विमान हवाई दलात कार्यरत असून सध्या भारताकडे अशा २०० हून अधिक विमानांचा ताफा आहे.
