बाळापूर किल्ल्याचा बुरुज कोसळला: ऐतिहासिक वारसा जपण्या कडे दुर्लक्ष?

अकोला : बाळापूर येथील ऐतिहासिक किल्ल्याचा एक बुरुज गुरुवारी मुसळधार पावसामुळे कोसळला. सुदैवाने या घटनेत कोणतीही जीवितहानी झाली नाही, कारण बुरुज ढासळला तेव्हा परिसरात कोणीही नव्हते. मात्र, या घटनेमुळे भारतातील पुरातन वास्तूंच्या जतन आणि संरक्षणाकडे होत असलेल्या दुर्लक्षावर पुन्हा एकदा प्रश्नचिन्ह निर्माण झाले आहे.
‎
‎गेल्या काही दिवसांपासून बाळापूर आणि परिसरात जोरदार पाऊस सुरू आहे. नद्यांना पूर आल्याने किल्ल्याच्या कमकुवत झालेल्या बुरुजांवर याचा मोठा परिणाम झाला. बुरुजांना आधीच तडे गेले होते आणि त्यात पावसाचे पाणी साचल्यामुळे अखेर आज दुपारी हा बुरुज पत्त्याच्या बंगल्याप्रमाणे कोसळला.
‎
‎बाळापूर किल्ला हे राष्ट्रीय संरक्षित स्मारक म्हणून घोषित असूनही, पुरातत्व विभागाने त्याच्या देखभालीकडे आणि दुरुस्तीकडे दुर्लक्ष केल्याचा आरोप स्थानिक नागरिक, इतिहासप्रेमी आणि संशोधकांकडून केला जात आहे. किल्ल्याच्या परिसरातच राज्य शासनाची उपविभागीय आणि तहसील कार्यालये कार्यरत आहेत, त्यामुळे या किल्ल्याचे महत्त्व आणखी वाढते.
‎
‎या घटनेमुळे इतिहासप्रेमींनी तीव्र दुःख व्यक्त केले आहे. त्यांनी मागणी केली आहे की, उर्वरित किल्ल्याची तातडीने पाहणी करून संरक्षक उपाययोजना राबवण्यात याव्यात. तसेच, किल्ल्याच्या पुनरुत्थानासाठी विशेष निधी उभारून त्याचे जतन करण्याची मागणी आता जोर धरू लागली आहे. भारताच्या समृद्ध इतिहासाचे साक्षीदार असलेल्या अशा ऐतिहासिक वास्तूंचे जतन करणे अत्यंत महत्त्वाचे आहे, जेणेकरून भावी पिढ्यांना आपला वारसा अनुभवता येईल.