नागपूर : बाबुळखेडा येथील नंदा आणि चेतन बोरकर या दाम्पत्याला तब्बल पंधरा वर्षांनंतर बाळप्राप्ती झाली, परंतु दुर्दैवाने सरकारी मेडिकल कॉलेजमधील नर्सेसच्या संपामुळे बाळाच्या देखभालीत झालेल्या निष्काळजीपणामुळे काही तासांतच बाळाचा मृत्यू झाला. ही घटना समजताच वंचित बहुजन आघाडीचे दक्षिण नागपूर विधानसभेचे नेते विजय पाटील यांनी मेडिकलच्या मुख्य अधिष्ठाता गजनी साहेबांची भेट घेऊन यासंदर्भात लिखित निवेदन दिले.
विजय पाटील यांनी स्पष्ट शब्दांत सांगितले की, संवेदनशील रुग्ण, विशेषतः बाळंतिणी आणि नवजात बाळांवर विशेष लक्ष दिले पाहिजे. आरोग्यसेवेतील कुचराईमुळे सामान्य जनतेचा सरकारी यंत्रणांवरचा विश्वास उडतो आहे. अशा घटना टाळण्यासाठी आरोग्य व्यवस्थेने अधिक दक्ष राहिले पाहिजे.
ते पुढे म्हणाले, पोलीस, मिलिटरी आणि मेडिकल कर्मचारी हे समाजाचे रक्षक आहेत. त्यांना मूलभूत सुविधा आणि सन्मान देण्यात आले, तर त्यांना आंदोलन करण्याची वेळच येणार नाही. जनतेच्या गैरसोयी टाळण्यासाठी शासनाने पुढाकार घ्यावा.
या निवेदनप्रसंगी किरण देवरे, राहुल भिमटे, भगवान कांबळे, प्रशांत शेंडे, मृत बाळाचे वडील चेतन बोरकर, शत्रुघ्न विजय, मोहम्मद घोष, किशोर धोटे व इतर वंचित बहुजन आघाडीचे कार्यकर्ते पदाधिकारी मोठ्या संख्येने उपस्थित होते.
