कर्जत (अ. नगर) : घरगुती गॅस सिलेंडर तुटवडा आणि वाढती महागाई याच्या निषेधार्थ आज सोमवार (दि. १६ मार्च) रोजी सकाळी ११ वाजता कर्जत तहसील कार्यालयासमोर वंचित बहुजन आघाडीच्या वतीने जाहीर निदर्शने आंदोलन करण्यात आले. हे आंदोलन वंचित बहुजन आघाडीचे महाराष्ट्र राज्य प्रदेश प्रवक्ते अरुण जाधव यांच्या नेतृत्वाखाली पार पडले. (Vanchit Bahujan Aghadi Protest)
यावेळी बोलताना ॲड. अरुण जाधव यांनी आंतरराष्ट्रीय पातळीवर चर्चेत असलेल्या जेफ्री एपस्टीन (Jeffrey Epstein) प्रकरणाचा संदर्भ देत पंतप्रधान नरेंद्र मोदी (Narendra Modi) यांच्यावर गंभीर आरोप केले. तसेच अमेरिकेचे माजी राष्ट्राध्यक्ष डोनाल्ड ट्रम्प (Donald Trump) यांच्याकडून या प्रकरणाच्या माध्यमातून दबाव टाकला जात असल्याचा आरोपही त्यांनी केला. या सर्व घडामोडींमुळे देशाच्या सार्वभौमत्वावर प्रश्नचिन्ह निर्माण झाले असून पंतप्रधानांनी या संदर्भात देशासमोर स्पष्टीकरण द्यावे, अशी मागणी त्यांनी केली.
याचबरोबर देशात वाढलेली महागाई, पेट्रोल-डिझेल दरवाढ आणि घरगुती गॅस सिलेंडरचा तुटवडा याविरोधात केंद्र सरकारच्या धोरणांवरही त्यांनी टीका केली. (Vanchit Bahujan Aghadi Protest)
या आंदोलनात युवा आघाडीचे जिल्हाध्यक्ष सोमनाथ भैलुमे, आप्पा सरोदे, तुकाराम पवार, गोदड समुद्र यांचीही भाषणे झाली. यावेळी युवा आघाडी तालुका अध्यक्ष दत्ता भालेराव, जिल्हा महासचिव संजय शेलार, जिल्हा उपाध्यक्ष लखन पारसे, ज्येष्ठ सल्लागार दिलीप हिरभगत, कर्जत शहराध्यक्ष विकास समुद्र, प्रदीप समुद्र, मनोज हिरभगत, रवि सोनवणे, हरीन पोटरे, भाऊ पोटरे, रंगीशा काळे, नुरा भोसले, काजोरी पवार, जुकी भोसले यांच्यासह अनेक पदाधिकारी व भीमसैनिक उपस्थित होते. आंदोलनाचे नियोजन व आयोजन तालुकाध्यक्ष दत्ता भालेराव यांनी केले. तर आंदोलनाची सविस्तर माहिती कर्जत शहराध्यक्ष विकास समुद्र यांनी दिली.
