मुंबई : पवई येथील जय भीम नगर परिसरातील बुद्ध विहारावर मुंबई महानगरपालिकेच्या (BMC) प्रशासनाकडून तोडक कारवाई करण्यात येत असताना वंचित बहुजन आघाडीच्या कार्यकर्त्यांनी तीव्र विरोध दर्शविला. या कारवाईच्या निषेधार्थ वंचित बहुजन आघाडी मुंबईच्या पदाधिकारी व कार्यकर्त्यांनी घटनास्थळी आंदोलन छेडले.
बुद्ध विहारावर सुरू असलेल्या या कारवाईविरोधात कार्यकर्त्यांनी घोषणाबाजी करत प्रशासनाला जाब विचारला. परिस्थिती तणावपूर्ण बनत असल्याचे पाहता पोलिसांनी हस्तक्षेप करत आंदोलन करणाऱ्या कार्यकर्त्यांना ताब्यात घेतले.
या कारवाईदरम्यान वंचित बहुजन आघाडी मुंबई युवा अध्यक्ष सागर गवई, महिला अध्यक्ष स्नेहल सोहनी, युवा महासचिव विपुल हिरे यांच्यासह इतर कार्यकर्त्यांना पोलिसांनी ताब्यात घेतले. बुद्ध विहारावरील तोडक कारवाई तात्काळ थांबवावी, अशी मागणी आंदोलनकर्त्यांनी यावेळी केली.
दरम्यान, या घटनेमुळे जय भीम नगर परिसरात काही काळ तणावाचे वातावरण निर्माण झाले होते. स्थानिक नागरिकांनीही बुद्ध विहारावरील कारवाईबाबत नाराजी व्यक्त केली असून प्रशासनाने या प्रकरणात संवेदनशीलतेने भूमिका घ्यावी, अशी मागणी करण्यात येत आहे.
