मुंबई : सलग दोन दिवस हवा गुणवत्ता निर्देशांक (AQI) शंभरीच्या आत राहिल्यानंतर मुंबईतील प्रदूषणात पुन्हा वाढ होत असल्याचे चित्र दिसत आहे. फेब्रुवारीच्या अखेरीस प्रत्येकी 94 असा एक्यूआय नोंदवला गेला होता. त्यामुळे मार्चमध्ये प्रदूषणाची पातळी नियंत्रणात राहील, अशी अपेक्षा व्यक्त केली जात होती. मात्र नव्या महिन्याच्या सुरुवातीलाच परिस्थितीत बदल झाला आहे.
रविवारी शहराचा सरासरी एक्यूआय 118 इतका नोंदवला गेला. गेल्या चार दिवसांतील हा दुसऱ्या क्रमांकाचा उच्चांक ठरला. त्यामुळे पुन्हा एकदा प्रदूषणाचे ढग दाटू लागल्याची चिन्हे दिसत आहेत.
रविवारी हिरानंदानी गार्डन, पवई येथे 147 इतका एक्यूआय नोंदवून सर्वाधिक प्रदूषण आढळले. त्यापाठोपाठ मराठा कॉलनी, विलेपार्ले येथे 139 एक्यूआयची नोंद झाली. दुसरीकडे गावदेवी येथे सर्वात कमी 58 एक्यूआय नोंदवला गेला, तर कन्नमवार नगर 2, विक्रोळी येथे 75 इतकी पातळी होती.
दरम्यान, शहरातील तापमानही तिशीपार कायम आहे. सांताक्रूझ वेधशाळेच्या नोंदीनुसार रविवारी किमान तापमान 20 अंश सेल्सिअस, तर कमाल तापमान 31 अंश सेल्सिअस होते. India Meteorological Department (आयएमडी) च्या साप्ताहिक अंदाजानुसार सोमवारी कमाल तापमान 33 अंश सेल्सिअसपर्यंत जाण्याची शक्यता आहे. एकूणच, मार्चच्या सुरुवातीलाच वाढलेले प्रदूषण आणि चढते तापमान यामुळे मुंबईकरांसाठी आरोग्याच्या दृष्टीने सतर्क राहण्याची गरज निर्माण झाली आहे.
