मुंबई: एपस्टीन फाईल्स प्रकरण आणि अमेरिकेशी सुरू असलेल्या एकतर्फी व्यापार धोरणावरून देशातील राजकीय वातावरण चांगलेच तापले आहे. या प्रकरणाचे पडसाद आता रस्त्यावर उमटू लागले असून, आज मुंबईतील छत्रपती शिवाजी महाराज टर्मिनस (CSMT) परिसरात वंचित बहुजन आघाडीच्या वतीने ‘महाआंदोलन’ छेडण्यात आले आहे. “मोदी हटाव, देश बचाव” अशी घोषणा देत कार्यकर्ते आक्रमक झाले असून परिसरात मोठा पोलीस बंदोबस्त तैनात करण्यात आला आहे.
एपस्टीन फाईल्समध्ये पंतप्रधान मोदींचा उल्लेख असल्याच्या बातम्यांवरून देशभरात संतापाची लाट उसळली आहे. या प्रकरणाची पारदर्शक चौकशी व्हावी, अशी मागणी आंदोलकांकडून केली जात आहे.
अमेरिकेशी सुरू असलेल्या व्यापार करारांमुळे देशाचे आर्थिक नुकसान होत असल्याचा आरोप वंचित बहुजन आघाडीने केला आहे. या गंभीर मुद्द्यांवर केंद्र सरकारने आपली भूमिका स्पष्ट करावी, या मागणीसाठी हे आंदोलन पुकारण्यात आले आहे.
हे आंदोलन वंचित बहुजन आघाडीचे राष्ट्रीय अध्यक्ष ॲड. प्रकाश (बाळासाहेब) आंबेडकर यांच्या नेतृत्वाखाली होत आहे. थोड्याच वेळात बाळासाहेब आंबेडकर आंदोलनस्थळी दाखल होणार असून, ते कार्यकर्त्यांना संबोधित करतील. त्यांच्या आगमनापूर्वीच CSMT परिसरात कार्यकर्त्यांनी मोठी गर्दी केली असून केंद्र सरकारच्या विरोधात जोरदार घोषणाबाजी सुरू आहे.
