मुंबई : आज मुंबईतील छत्रपती शिवाजी महाराज टर्मिनस परिसरात वंचित बहुजन आघाडीचे कार्यकर्ते मोठ्या संख्येने रस्त्यावर उतरले आहेत. आंतरराष्ट्रीय स्तरावर गाजत असलेल्या जेफ्री एपस्टीन प्रकरण आणि अमेरिकेशी सुरू असलेल्या ‘एकतर्फी’ व्यापारावरून नागरिकांमध्ये संतापाची लाट उसळली आहे.
वंचित बहुजन आघाडीचे युवा नेते सुजात आंबेडकर यांनी या प्रसंगी पंतप्रधान नरेंद्र मोदी यांच्यावर गंभीर आरोप केले. ते म्हणाले, जेफ्री एपस्टिन अत्यंत क्रूर आणि नीच मनुष्य होता. याच्याशी संबंध ठेवणारे सर्व लोकं ही त्याच वृत्तीची आहेत. पंतप्रधान नरेंद्र मोदी यांच्याशी एपस्टिनचे संबंध होते. इथल्या जनतेने, मीडियाने सरकारला याचा जाब विचारला पाहिजे. (Mumbai protest)
सुजात आंबेडकर यांनी माध्यमांवरही टीका केली आणि म्हटले की, आजचा गोदी मीडिया भाजपच्या खिशात बसलाय, त्यामुळे ते मोदी सरकारला प्रश्न विचारत नाहीये.
पुढे ते म्हणाले, जगभरातील ज्या लोकांचे नाव एपस्टिन फाईल मध्ये आले आहेत, त्या लोकांनी राजीनामे दिले आहेत. भारतातील मंत्री त्या बाबत काहीच बोलत नाही. आमची मागणी आहे की, पंतप्रधान नरेंद्र मोदी यांनी राजीनामा द्यावा. कारण, आपला पंतप्रधान एका बलात्कारी माणसाचा मित्र आहे. भारतातून 30 लाख मुली गायब आहेत. याचे उत्तर पंतप्रधानने दिले पाहिजे. (Mumbai protest)
यावेळी कार्यकर्त्यांनी “मोदी हटाव, देश बचाव” अशा घोषणाबाजीसह केंद्र सरकारच्या विरोधात जोरदार आंदोलन केले. परिसरात मोठा पोलीस बंदोबस्त तैनात करण्यात आला होता. या आंदोलनामुळे CSMT परिसरात मोठी गर्दी उसळली असून, राजकीय वर्तुळात या आरोपांमुळे चर्चा सुरू आहे. या आंदोलनात मोठ्या संख्येने नागरिक उपस्थित आहे.
