मुंबई : मुंबईतील कुर्ला, चेंबूर आणि ट्रॉम्बे परिसरात रेल्वे मार्गालगत असलेल्या ५ हजार ४५३ झोपड्यांवरील प्रस्तावित कारवाईला स्थगिती मिळाली आहे. झोपडपट्टीधारकांचे पुनर्वसन होईपर्यंत त्यांच्या घरांवर कोणतीही कारवाई केली जाणार नाही, अशी माहिती वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी दिली आहे.
मुंबई उच्च न्यायालयाने कुर्ला, चेंबूर आणि ट्रॉम्बे परिसरातील रेल्वे मार्गालगत असलेल्या झोपड्यांचे पुनर्वसन करण्याचे आदेश दिले होते. मात्र, या निर्णयाकडे दुर्लक्ष करून रेल्वे प्रशासनाने १७ नोव्हेंबर रोजी ५ हजार ४५३ झोपड्यांवर कारवाई करण्याचे जाहीर केले होते. त्यामुळे हजारो झोपडपट्टीधारकांच्या घरांवर बेघर होण्याचे संकट निर्माण झाले होते.
या पार्श्वभूमीवर आज राज्याचे उपमुख्यमंत्री तथा नगरविकास मंत्री एकनाथ शिंदे यांच्यासोबत ॲड. आंबेडकरांची बैठक झाली. या बैठकीदरम्यान रेल्वेमंत्र्यांशीही दूरध्वनीवरून चर्चा करण्यात आली. त्यानंतर मुंबईतील रेल्वेच्या जमिनींसंदर्भात सविस्तर प्रकल्प अहवाल (डीपीआर) तयार करण्यास रेल्वेने मान्यता दिली आहे. तसेच, १७ नोव्हेंबर रोजी होणारी झोपड्यांवरील कारवाईही स्थगित करण्यात आली आहे.
झोपडपट्टीधारकांना त्यांच्या हक्काची घरे मिळेपर्यंत त्यांच्या सध्याच्या घरांवर कोणतीही कारवाई केली जाणार नाही, असे स्पष्ट करत हा निर्णय मुंबईतील हजारो झोपडपट्टीधारकांचा विजय असल्याचे ॲड. प्रकाश आंबेडकर यांनी म्हटले आहे.
रेल्वे मार्गालगत राहणाऱ्या हजारो कुटुंबांच्या निवाऱ्याचा प्रश्न ऐरणीवर असताना मिळालेली ही स्थगिती संबंधित रहिवाशांना मोठा दिलासा देणारी ठरली आहे.
