नाशिक : दिल्लीतील जंतर-मंतर येथे NEET परीक्षा आणि विद्यार्थ्यांच्या विविध मागण्यांसाठी आंदोलन करणाऱ्या विद्यार्थ्यांवर झालेल्या कथित पोलिस लाठीचार्जच्या निषेधार्थ, तसेच विद्यार्थ्यांच्या आंदोलनाला पाठिंबा दर्शवण्यासाठी वंचित बहुजन आघाडी आणि समस्त ग्रामस्थ, कसबे वणी यांच्या वतीने बुधवार, दि. २३ जुलै २०२६ रोजी वणी बंद पाळण्यात येणार असल्याची माहिती देण्यात आली.
या पार्श्वभूमीवर वणी पोलीस ठाण्याच्या एपीआय पाटील यांना बंद संदर्भात निवेदन सादर करण्यात आले. शांततापूर्ण आणि लोकशाही मार्गाने बंदचे आयोजन करण्यात येणार असून नागरिकांनी सहकार्य करावे, असे आवाहन यावेळी करण्यात आले.
दरम्यान, दिल्लीतील जंतर-मंतर येथे NEET परीक्षा आणि विद्यार्थ्यांच्या विविध मागण्यांसाठी आंदोलन करणाऱ्या विद्यार्थ्यांवर झालेल्या पोलिस कारवाईच्या निषेधार्थ वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी २३ जुलै रोजी महाराष्ट्र बंदची घोषणा केली आहे. मुंबई येथील पक्ष कार्यालयात आयोजित पत्रकार परिषदेत त्यांनी ही घोषणा करत विद्यार्थ्यांच्या न्याय्य मागण्यांना पाठिंबा दर्शविला. या घोषणेनंतर राज्यभरात विविध ठिकाणी महाराष्ट्र बंदला पाठिंबा व्यक्त केला जात आहे.
