सातारा : साताऱ्यात स्थानिक स्वराज्य संस्था व पदवीधर मतदारसंघ निवडणुकीच्या पार्श्वभूमीवर वंचित बहुजन आघाडीचा भव्य कार्यकर्ता मेळावा पार पडला. या मेळाव्याला पक्षाचे युवा नेते सुजात आंबेडकर प्रमुख उपस्थित होते.
यावेळी कार्यकर्त्यांना मार्गदर्शन करताना सुजात आंबेडकर यांनी आगामी निवडणुका प्रभावीपणे लढवण्यासाठी पक्षबांधणी अधिक मजबूत करण्यावर भर दिला. तळागाळातील जनतेपर्यंत पक्षाची ध्येयधोरणे पोहोचवून विजय मिळवण्याचा निर्धार यावेळी करण्यात आला. स्थानिक प्रश्न, जनतेच्या अपेक्षा आणि वंचित घटकांच्या हक्कांसाठी जोरदार लढा देण्याचा संकल्प या मेळाव्यात घेण्यात आला.
मेळाव्यात आगामी निवडणुकांसाठी प्रचारयोजना, बूथ स्तरावर संघटन उभारणी, युवक व महिलांचा सहभाग वाढवणे या मुद्द्यांवर सविस्तर चर्चा झाली. प्रत्येक कार्यकर्त्याने पक्षाचा विचार घराघरात पोहोचवण्याचे आवाहन करण्यात आले.
या कार्यकर्ता मेळाव्याला राष्ट्रीय कार्यकारिणी सदस्य डॉ. क्रांती सावंत, राज्य उपाध्यक्ष सोमनाथ साळुंखे, सम्यक विद्यार्थी आंदोलनाचे राज्य प्रवक्ते प्रशांत बोराडे तसेच कोल्हापूर जिल्ह्यातील पदाधिकारी व कार्यकर्ते मोठ्या संख्येने उपस्थित होते.
मेळाव्यामुळे सातारा जिल्ह्यात वंचित बहुजन आघाडीची निवडणूक तयारी अधिक गतीमान झाली असून कार्यकर्त्यांमध्ये उत्साहाचे वातावरण निर्माण झाले आहे.
