दौंड : दौंड येथील राज्य राखीव पोलीस दलाच्या मैदानावर पोलीस भरती प्रक्रियेदरम्यान एक धक्कादायक प्रकार घडला. भरतीसाठी आलेल्या एका उमेदवाराने शारीरिक क्षमता वाढवण्यासाठी घेतलेल्या संशयास्पद पेयामुळे त्याची प्रकृती अचानक बिघडली आणि मैदानावर गोंधळाची परिस्थिती निर्माण झाली.
मिळालेल्या माहितीनुसार, धावण्याच्या चाचणीत चांगले प्रदर्शन करण्यासाठी संबंधित उमेदवाराने उत्तेजक किंवा अंमली स्वरूपाचे पेय सेवन केले होते. सुरुवातीला त्याने धावण्याची परीक्षा पूर्ण केली; मात्र काही वेळातच त्या पेयाचा विपरीत परिणाम दिसून आला. त्याची मानसिक अवस्था अस्थिर झाली आणि तो अनियंत्रित वर्तन करू लागला. (Pune News)
त्यामुळे उपस्थित उमेदवार आणि अधिकाऱ्यांमध्ये भीतीचे वातावरण पसरले. घटनेची माहिती मिळताच तेथे तैनात एसआरपीएफ जवानांनी तात्काळ हस्तक्षेप करत परिस्थिती नियंत्रणात आणली. संबंधित उमेदवाराला ताब्यात घेऊन त्याला त्वरित जवळच्या रुग्णालयात हलवण्यात आले. डॉक्टरांनी तातडीने उपचार सुरू केल्यामुळे सध्या त्याची प्रकृती स्थिर असल्याचे सांगण्यात येत आहे. (Pune News)
या घटनेमुळे भरती प्रक्रियेत शॉर्टकटचा अवलंब करण्याचे धोके अधोरेखित झाले आहेत. उत्तेजक पदार्थांचा वापर केल्याने उमेदवाराच्या आरोग्यावर गंभीर परिणाम झाला. दरम्यान, या घटनेमुळे भरती प्रक्रियेत एकच खळबळ उडाली.
