नांदेड : वाढत्या महागाई आणि गॅस सिलिंडर दरवाढीच्या मुद्द्यावरून वंचित बहुजन आघाडीने आक्रमक भूमिका घेतली असून, ‘नरेंदर कब मिलेगा सिलेंडर’ या राज्यव्यापी आंदोलनाची घोषणा करण्यात आली आहे. या आंदोलनाची पूर्वतयारी बैठक नांदेड येथील विसावा हॉटेलमध्ये पार पडली.
वंचित बहुजन आघाडीचे राष्ट्रीय अध्यक्ष ॲड. बाळासाहेब आंबेडकर यांच्या आदेशानुसार हे आंदोलन पुकारण्यात आले आहे. येत्या ६ एप्रिल २०२६ रोजी सकाळी ११ वाजता नांदेड जिल्हाधिकारी कार्यालयासमोर मोठ्या संख्येने पदाधिकारी व कार्यकर्ते एकत्र येऊन केंद्र सरकारच्या धोरणांचा निषेध नोंदवणार आहेत. (Vanchit bahujan aghadi)
बैठकीस राज्य उपाध्यक्ष फारुक अहमद, राज्य कार्यकारिणी सदस्य अविनाश भोसीकर, जिल्हाध्यक्ष शंकर महाजन, राज अटकोरे, गटनेते प्रशांत इंगोले, जिल्हा महासचिव रवि पंडीत, दिपक मगर, जिल्हा संघटक संजय टिके, माजी शहराध्यक्ष विठ्ठल गायकवाड यांच्यासह अनेक पदाधिकारी उपस्थित होते. तसेच नगरसेवक व प्रतिनिधींनीही आपल्या मनोगतातून आंदोलनाला पाठिंबा दर्शवला. (Vanchit bahujan aghadi)
यावेळी आंदोलनाची रणनीती ठरवण्यात आली असून कार्यकर्त्यांमध्ये मोठा उत्साह पाहायला मिळाला. गॅस सिलिंडरच्या सातत्याने वाढणाऱ्या किमतींमुळे सर्वसामान्य नागरिकांचे आर्थिक गणित बिघडले असल्याची भावना व्यक्त करण्यात आली. या पार्श्वभूमीवर सरकारला जाब विचारण्यासाठी ६ एप्रिल रोजी नांदेड जिल्हाधिकारी कार्यालयासमोर मोठ्या संख्येने उपस्थित राहण्याचे आवाहन वंचित बहुजन आघाडीच्या वतीने करण्यात आले आहे.
